Les formaciones nacionalistes entamen los alcuerdos de cara a les próximes elecciones europees de xunu. D’esti mou, Esquerra Republicana de Catalunya ta acabante de dar anuncia del alcuerdu cola formación vasca Aralar pa concurrir xuntos a los comicios.  Dende ERC dase por fecho tamién la participación na coalición electoral, que vuelve a denominase “Europa de los pueblos”, de la Chunta Aragonesista y d’Entesa Per Mallorca.

La fuelga convocada pol sindicatu Médlicu Profesional d'Asturies (Simpa) nes urxencies hospitalaries del Principáu caltiénse güei na so cuarta xornada sin incidentes na asistencia a pacientes. Según indicó a Europa Press el voceru del Simpa, Antonio Matador, el conceyu calteníu güei ante'l sindicatu y el Serviciu de Salú (Sespa) "nun valió pa nada".

El grupu d'estudiantes de l'Asamblea contra'l Plan Bolonia que s'enzarró ayeri na Universidá d'Uviéu en solidaridá colos sos compañeros de Barcelona abandonó esta mañana l'enzarru, anque tien previsto convocar nueves aiciones nel mes d'abril, según confirmaron a Europa Press.

El plenu del Parlamentu Européu aprobó güei por una amplia mayoría de 349 votos a favor, 110 a la escontra y 114 astenciones un informe que pide conxelar los fondos comunitarios pa España si nun se resuelven los abusos urbanísticos denunciaos en Bruseles y por ciudadanos de dellos países de la UE. L'informe contaba cola oposición de socialistes y populares españoles, que nun llograron convencer al restu d'eurodiputaos de los sos partíos d'otres nacionalidaes de que votaren a la escontra.

El PP va xestionar la presidencia del parlamentu vascu y el PSE-EE va reservase dos puestos na Mesa, asegurándose asina estos dos partíos la mayoría nel órganu de gobiernu de la Cámara, según acordaron esta tarde les delegaciones negociadores al completu d'estes formaciones, aconceyaes na Cámara vasca por espaciu de 50 minutos.

L’ex-arquitectu municipal de Xixón, Ovidio Blanco, que ta siendo investigáu pola Fiscalía por cuenta de la compraventa d’un terrenu incluyíu nel plan parcial de Cabueñes na qu’algamó un beneficiu de 600.000 euros continúa nel centru de la polémica. Mientres que SOXEPSA decidió finar el contratu col arquitectu “de mutuo acuerdu”, la Plataforma contra’l Muro de Cabueñes va personase como acusación nel procesu abiertu pola Fiscalía.

La XDLA llama a concentrase'l prósimu martes 31 de marzu a les 16:00 delantre la Escuela de Maxisteriu, nel Campus de Llamaquique de la Universidá d’Uviéu coincidiendo cola votación decisiva sobre la llingua asturiana.

 
El próximu martes 31 de marzu la Xunta d’Escuela de Maxisteriu va aconceyar con un únicu puntu de debate, la presencia de la llingua asturiana nos nuevos planes d’estudios qu’han aprobase pal procesu de converxencia del marcu européu de Bolonia.

Na reunión selmanal del Conseyu de Gobiernu aprobóse’l decretu qu’afita la nueva toponimia oficial del conceyu de Yernes y Tameza. Les nueves denominaciones, aprobaes pola Xunta de Toponimia y yá col preste del Gobiernu asturianu, pasen a tener la consideración de denominaciones oficiales.

El Parlamentu Européu aprobó una resolución ellaborada por eurodiputaos del PSC, CiU, ICV, PNV y EA na que se diz que ye "vital salvaguardar el multillingüismu en países o rexones donde coexisten dos o más llingües oficiales”. Esti testu elimina una enmienda a un informe sobre multillingüismu presentada pol PP na que defendía “que los pas escueyan la llingua d’escolarización de los sos fíos”.

El Conceyu de Bimenes ta acabante de convocar la duodécima edición del so yá tradicional Concursu de Cuentos pola Oficialidá del asturianu. Los rellatos tienen que tener un llargor másimu de 10 fueyes y el plazu de presentación remata’l 5 de xunu. Esti concursu afita tres premios de 800, 500 y 300 euros pal relatu ganador, el segundu y el terceru respectivamente. Asturies.com ufre a los sos llectores les bases completes del concursu en formatu pdf.