L'Asociación d'Escritores d'Asturies dio anuncia de los premiaos na tercer edición de los "Premios de la crítica d'Asturies", ente los que rescamplen los autores en llingua asturiana Cristina Muñiz, Antón García, Vicente García Oliva y Severino Antuña. Asimesmo concedió al escritor en castellán Luís Fernández Roces el premiu'l "III Premio de las letras asturianas". Los premios de la crítica na so tercer edición premiaron les obres publicaes en 2007 qu'a xuiciu del xurau mas destaquen nes sos respectives categories.

El Secretariu xeneral de la Federación Socialista d'Asturies, Javier Fernández, dixo que-y abultaba esmolecedor qu'Izquierda Xunida - Bloque por Asturies - Los Verdes plantearen "cuestiones irrenunciables" nel marcu d'un futuru alcuerdu de gobiernu colos socialistes primero de sentase a negociar.

La Fiscalía del Tribunal Superior de Xusticia d'Asturies (TSXA) abrió "dilixencies d'investigación" pola denuncia presentada pola Asamblea de Ciudadanos pola Izquierda (Asciz) sobre la rellación del alcalde d'Uviéu, Gabino de Lorenzo, cola 'Yeguada Picos d'Europa'. Asciz unvió, según informó nuna nota prensa, al Ministeriu Fiscal un escritu nel que facía constar la sospecha de "tapadura deliberada" per parte del primer edil de bienes de la so propiedá que podíen ser constitutivos de delitu.

Los ministros d'Economía de la eurozona aseguraron güei que nun van permitir que resquiebre nengún bancu de la Unión Europea por mor de les actuales dificultaes y que cada Estáu miembru va adoptar les midíes necesaries pa salvar a les instituciones financieres de dificultaes. "Tamos d'acuerdu en que nenguna institución financiera sistemáica tien de frayar. Toos tamos comprometíos na vía del salvamentu de los bancos y de les aseguradores", dixo'l primer ministru luxemburgúes y presidente del Eurogrupu, Jean-Claude Juncker, al acabar el conceyu.