El próximu presidente de Galicia, Alberto Núñez Feijoo, afitó que “nun quier nenguna imposición llingüística” polo que va derogar el decretu d’“uso e promoción da lingua no ensino”, aprobáu pol gobiernu del PSOE y BNG en 2007. Según’l Partido Popular “hai una perda del usu del idioma gallegu” por una “mala política llingüística y la imposición del idioma” del anterior gobiernu.

La polémica continúa poles declaraciones de Consuelo Vega nes que desvinculaba la situación de peligru del idioma cola falta d’oficialidá. La XDLLA entruga agora “si la campaña que ta llevando alantre la Directora de Política Llingüística entra dientro de los alcuerdos del pautu de gobiernu”.

La Coordinadora Ecoloxista d'Asturies denuncia que la planta cementera de Rozón (conceyu L.lena) lleva furrulando 11 meses ensin llicencia y que los terrenos nos qu’asitia tan alquilaos por una Fundación que preside’l propiu alcalde. Por too ello desixen la so “inmediata paralización”.

Llangres vuelve a casa pa presentar “Entá”, últimu cd de la banda que presentó la seronda pasada. El grupu va xubir al escenariu cola so formación nueva, qu’amiesta batería, teclaos y baxu a la base instrumental folk que ya tenía Llangres.
 

Esti vienres día 6 de marzu, el grupu teatral Syntexto estrenará la obra dramática “Oh 36!” de Lluís Portal -galardonada nel añu 2007 col Premiu Uviéu, que convoca'l conceyu uvieín-, nel Teatru Riera de Villaviciosa. La obra inspírase na esperiencia vivida pol médicu y escritor maliayés Carlos de la Concha García-Ciaño (Villaviciosa 1887 - Xixón 1965) nel trescursu de la guerra civil española. 

La Sociedá Xeneral d'Autores matiza que los derechos d'autor que cobra pola interpretación de música del folclore tradicional ye en conceutu de les versiones y igües. Ye la respuesta de la SGAE  al conceyal d'Uviéu, José Suárez Arias-Cachero, que ta acabante quexase del cobru por pieces de música tradicional.
  

Bloque por Asturies y Unidá Nacionalista Asturiana refugaron la comparanza de la llingua asturiana col vascu y col inglés d'EE.UU que fixo Consuelo Vega, cuando afirmó que la oficialidá de la llingua nun tien que ver col so peligru de desapaición. A les crítiques axuntóse tamién l'Asociación de Trabayadores de Normalización Llingüística.

La Coordinadora Ecoloxista d’Asturies ta acabante de presentar alegaciones na Dirección Xeneral de Minería y Enerxía contra l’ampliación de la cantera de Peñamiel, nel conceyu de Morcin.

L'Audiencia Nacional condenó a diez meses de cárcel por un delitu d'estragos al independentista asturianu Fernando González Rodríguez, al considerar probáu que'l 13 de setiembre del 2005 tentó de colocar dos artefautos esplosivos xunto a la sede del PSOE de L'Infiestu.