L'escritor Xurde Álvarez ta acabante d'asoleyar'l so quintu trabayu lliterariu. Esti nuevu poemariu lleva por títulu "La caída", ta editáu por Trabe y en palabres del propiu autor ta "escritu a manera de diariu, 'La caída' ye un percorríu pela desesperanza y la soledá, pel silenciu doliosu de la nada; un poemariu descarnáu y duru como pocos."

Alredor de 11.000 docentes de les enseñances non universitaries tan convocaos polos sindicatos SUATEA, CC.OO, CSIF y ANPE a una fuelga pola negativa de la Conseyería a reunir la mesa sectorial d'educación y a retirar el plan d'evaluación de docentes. Según una primer valoración de los convocantes, el paru ye seguíu por un 80% del profesoráu del país, lo que ye "un éxitu".

La Escuela de Maxisteriu de la Universidá d'Uviéu va contar con especialidá de Llingua Asturiana nos planes resultantes de la próxima reforma de les sos enseñances. La Xunta d'Escuela aprobó güei por 58 votos a favor, 26 a la escontra y 3 votos blancos, crear la mención d'asturianu, un bloque d'asignatures que van sumar un mínimu de 30 creitos.

El númberu 100 de la revista Lletres Asturianes, publicación oficial de l'Academia de la Llingua Asturiana, presentóse güei nun emotivu actu nel que'l so primer director, Xosé Lluis García Arias, reivindicóla como un "respiraderu per onde alienda la llingua", frente a lo que definió como la "representación rural pueblerina" d'esti idioma que, dende'l so puntu de vista, faen munchos medios de comunicación.

Na mañana d'esti llunes día 30 conocióse'l ganador del Premiu Fini Suárez d'investigación folclórica. El ganador na novena edición foi Xosé Antón Fernández "Ambás", investigador y comunicador del folclore asturianu, que nos últimos años rescampla como una de les principales figures de la divulgación de la cultura tradicional asturiana, especialmente la musical.
 

Mañana ye'l día nel que la Xunta d'Escuela de Maxisteriu va decidir si la llingua asturiana va tener una Mención nos planes d'estudios. Dende los sectores de profesores y estudiantes que tán puxando por algamar un resultáu positivu vese la votación con un "optimismu moderáu".

La Conseyería de Cultura y Turismu ta acabante de dar el preste a los sos premios lliterarios en llingua asturiana. Nesta ocasión convóquense cinco categoríes: el “Máximo Fuertes Acevedo” pa ensayos, el “Xosefa Xovellanos” de novela, el “Xuan María Acebal” de poesía, y como novedaes respecto a la convocatoria del añu pasáu, el “María Josefa Canellada” de lliteratura infantil y xuvenil y l'"Alfonso Iglesias" de cómic.

Son pocos los que nel folk asturianu tienen nel so currículum un videu musical. Skanda, el grupu de folk-rock de la cuenca'l Caudal, incropórase a esi llistáu cortu  con un videu del cantar "Ser Humanu", tema del últimu discu de la banda.
 

L’Academia de la Llingua Asturiana presenta’l próximu martes día 31 de marzu, a les 12:00 hores, nel salon d’actos de la Obra Social y Cultural de Caxastur (C/ San Francisco, 4 - Uviéu) el númberu 100 del boletín oficial de la institución, la revista Lletres Asturianes.

El Plenu de la Xunta Xeneral del Principáu refugó güei colos votos a la escontra del PSOE y d'IU-BA-Verdes encamentar al conseyu de Gobiernu a presentar darréu nel Parlamentu'l Plan Autonómicu d'Inclusión social, asina como a cumplir los plazos previstos na Llei de Salariu Social Básicu acabando colos retrasos de les tramitaciones d'espedientes.