El Principáu cuenta con cuatro zones, toes nel occidente, con altu potencial d'aprovechamientu enerxéticu de les foles

La costa del Principáu d'Asturies cuenta con cuatro zones con altu potencial d'aprovechamientu enerxéticu de les foles, toes elles asitiaes nel occidente asturianu. Son concretamente les zones Tapia-El Franco; El Franco-Cuaña; Navia-Valdés y Valdés.
 
Asina se pon de manifiestu nel estudiu de la costa asturiana pal aprovechamientu del recursu enerxéticu de les foles ellaboráu pola Fundación Asturiana de la Enerxía, FAEN, por pidimientu del Principáu. El conseyeru d'Industria y Emplegu, Graciano Torre, presentó güei l'estudiu a los medios de comunicación, el cual tamién s'esplicó a los empresarios rellacionaos coles actividaes d'enerxía renovable.
 
Según esplicó Torre, pa desarrollar esti "complexu" estudiu se dividió la costa asturiana en 20 zones, evaluándose teniendo en cuenta siete criterios en caún d'ellos, como son el recursu del folaxe; la distancia a la costa; l'accesibilidá a la rede eléctrica; la distancia a puertu; la densidá d'actividá pesquera; la viabilidá ambiental sobre les zones costeres y la viabilidá ambiental sobre les zones marines.
 
Una vez estudiaos estos aspeutos consideróse que la meyor y "casi la única zona" pa poder aprovechar la enerxía de la mar ye la que va dende'l Cabu Peñes hacia l'occidente, con especial sensibilidá hacia les cuatro zones anteriormente mencionaes, que fueron estudiaes de manera más detallada.
 
Nel estudiu detállense amás les teunoloxíes existentes pa poder aprovechar esa enerxía y se descarten les que nun diben tener cabida na costa asturiana, fundamentalmente por razones de proteición medioambiental.
 
EMPRESES INTERESAES
 
El conseyeru destacó la importancia d'esti estudiu, sobre too teniendo encuenta que yá fueron varies --polo menos tres-- les empreses que se punxeron en contautu col gobiernu rexonal al tar interesaes en desarrollar esti tipu de teunoloxía. Torre aseguró que la intención ye tornar al Principáu nuna rexón pionera nel aprovechamientu enerxéticu de les foles.
 
"Sabemos qu'hai un interés real y una apuesta per otra parte de les empreses, pero ye qu'amás lo que queremos ye rellacionar esta actividá a otres munches xenerando emplegos", dixo Torre, qu'indicó que lo que se pretende ye aconceyar equí actividaes como la construcción de les teunoloxíes o instalaciones necesaries pa esi aprovechamientu enerxéticu.
 
Nesti sen, Torre manifestó que va trabayase con teunoloxíes yá existentes y nes que se comprabre'l so bon funcionamientu. "Tenemos una bona ventaya, y ye que contamos con munches zones con altu potencial enerxéticu", insistió Torre, que consideró qu'esta actividá se presente como una de les teunoloxíes renovables con mayor capacidá de desarrollu de los últimos años.