L’Sporting da otru pasu pa la permanencia

|

L’Sporting de Xixón algamó’l so segundu triunfu consecutivu nun partíu frente al Deportivo de La Coruña nel que l’árbitru señaló tres penaltis, dos d’ellos contra los xixoneses. Sicasí, estos fueron quién a superar a los gallegos, lo que dexa al Sporting con 33 puntos nel puestu decimuprimeru de la tabla.

L’Sporting dio ayer un pasu perimportante pa que’l nuesu país continúe teniendo un representante na máxima categoría del fútbol. Y ye qu’esti trunfu asitia a los asturianos a siete puntos del descensu.

Na tarde del domingu n’El Molinón viéronse dos partíos distintos. Per un llau una primera parte nel que xuegu circuló básicamente pel centru del campu, y nel que nengún de los dos equipos tuvo oportunidaes clares de gol, anque los gallegos llevaron ciertu peligru n’algunos remates de cabeza.

Pero la segunda parte foi otra historia, los últimos 45 minutos fueron alloriantes, marcándose los cinco goles, tres d’ellos de penalti.

El primer gol asturianu llegaría tres un disparu de Barral nel qu’incomprensiblemente Aranzubía dexa’l rechace a los pies de Luís Morán, que con too a favor supera al porteru visitante marcando casi a placer. El segundu gol llegaría darréu, cuando na siguiente xugada d’ataque del Sporting el canariu Carmelo paez que ye derribáu nel área nuna acción a lo menos dudosa. Barral nun diba desaprovechar la oportunidá y anotó’l 2 a 0. Nesi momentu parecía’l partíu resueltó pa los locales, pero un penalti a Verdú tresformáu por Sergio volvía a meter a los gallegos nel partíu énte l’allegría de los casi 3.000 seguidores gallegos que visitaron El Molinón. Nesi momentu l’Sporting buscó la sentencia, que llegó por mor d'un golazu del canteranu José Ángel, que gracies a un tiru de falta dio’l terceru pa los asturianos. Sicasí, l’arbitru, decidíu a nun pasar desapercibíu, nel minutu 85 volvió a señalar otru penalti contra l’Sporting, una infracción que namás vio él. Riki marcaría el segundu gol de los gallegos, dexando’l marcador col definitivu 3 a 2, anque l’sportinguista Bilic pudo tener el cuartu nes sos botes si nun llega a fallar un manu a manu con Aranzubía.

Tres esti trunfu los xixoneses visiten el próximu domingu al Numancia de Soria, equipu en descensu. Va ser otru de los partíos claves d’esta temporada.

 
Ficha técnica

Sporting de Xixón 3- Deportivo de La Coruña 2

Sporting: Lafuente, Cámara, Iván Hernández, Neru, José Ángel, Matabuena, Michel, Luis Morán (Diego Camacho m 67), Carmelo, Diego Castro (Kike Mateo m 89)y Barral (Bilic m 81).

Deportivo: Aranzubia, Laure, Lopo, Colotto, Filipe, Juan Rodríguez, Sergio (Valeron m 78), Lafita, Verdú, Guardado (Ricki m 55) y Lassad (Pablo Álvarez (m 63).

Goles: 1-0 Luis Morán (m 49), 2-0 Barral de penalti (m 51), 2-1 Sergio de penalti (m 67), 3-1 José Ángel (m 71), 3-2 Riki de penalti (m 85).

Árbitru: Rodríguez Santiago (castellanu). Sacó tarxetes amarielles a Filipe (m 31), Lopo (m 51), Iván Hernández (m 57), José Ángel (m 73), Cámara (m 85).

Comentarios

Ambiente de fútbol sensacional nes grades y 3 puntos fundamentales nel camín del oxetivu, que nun ye otru que la permanencia na meyor liga del mundu.
Agora a Soria a por toes!
 

Contador Estadistiques