Y con esto, alón

Güei, 25 de mayu, Asturies.com pieslla después de más d’un cuartu de sieglu informando n’asturianu
Asturies.com, o Asturia, como se llamó nel primer momentu esti mediu, que siempre foi accesible con un dominiu que después pasó a ser el nome xenéricu, nació un 3 de febreru de 1997, cuando la rede Internet entamaba a ser una realidá n’Asturies y nestos 25 años, colos sos momentos meyores y peores, convirtióse na referencia de la información n’asturianu.

La falta de viabilidá empresarial d'Araz Net SL, la empresa editora que cesa tamién la so actividá, fai que güei llegue’l momentu de dicir adiós dando les gracies a toles persones qu’estos años contribuyeron al proyectu: trabayadores, collaboradores, anunciantes, alministraciones y, sobre manera, a los y les llectores que foron la razón de ser d'esti mediu..

Asturies.com pasa a ser ya historia del periodismu n’asturianu y dexa, de dalguna manera, güérfano a la xente que tolos díes lleía y compartía les nuestres informaciones, porque la llingua asturiana, la comunidá de falantes d’asturianu, precisa medios propios nos que poder mirar y mirase. 

De xuru qu’otres persones garrarán el relevu y vendrán otros proyectos, viables dende’l puntu de vista empresarial y d’audiencia, que cumplan esti papel adaptándose al tiempu nel que vivimos. Nós lleguemos hasta equí, pero esto nun ye un final sinon la posibilidá de nuevos principios qu’asitien la visión asturianista del país y la llingua asturiana onde-yos correspuende dende’l puntu de vista informativu nel sieglu XXI.

Y con esto, alón.