Alerta de choque na ISS

La Espedición 18 de la Estación Espacial Internacional tuvo qu'abellugase más de 10 minutos dientro de la nave Soyuz énte'l peligru de choque col restu d'un satélite vieyu convertíu en chatarra espacial. Les midíes de precaución tomáronse namás llevantase los astronautes al entrar dientro del rangu de lo posible'l riesgu de colisión.

 
Darréu fíxose una maniobra pa esquivar el satélite que diba al debalu y los astronautes metiéronse dientro de la cápsula Soyuz dexando la compuerta a medio pesllar. Ellí dientro esperaron abellugaos a qu'escamplara, con tiempu de marxe de sobra pa zarrar dafechu la escotía y dexuncise, si yera qu'el trozu metálicu pinchaba'l cascu del complexu orbital o yera quién a esquitar un módulu d'otru.
 
El día, polo demás, trescurrió con normalidá y los espedicionarios dedicáronse a pasalu descansando, tal y como taba previsto tres el paséu espacial d'ayeri. Los miembros de la Espedición 18 son Michael Finke, Yuri Lonchakov y Sandra Magnus.
 
Demientres, el próximu vuelu del Discovery sigue la llarga llista de retrasos que tán a piques d'esgonciar la misión y acabar nun cambiu drásticu de calandariu. El despegue ta reaxustáu pal sábadu o domingu que vien.