El PSOE d'Aragón ta acabante de presentar nel rexistru de les Cortes Aragoneses una proposición de "Ley de Uso, Protección y Promoción de las Lenguas Propias de Aragón", que reconoz el catalán y l'aragonés como "llingües propies y históriques" de la Comunidá, anque nun-yos da estátus de cooficialidá xunto al castellán, que va siguir siendo la única llingua oficial d'esi país.

Un añu más el conceyu de Bimenes entama otra vuelta la "Fiesta de la Oficialidá de la Llingua Asturiana", un eventu que tien nesti sábadu 4 de xunetu'l so día central y col que se quier facer alcordanza de la declaración d'oficialidá del nuesu idioma nel conceyu yerbatu nel añu 1996. Una fiesta qu'axunta dellos actos alredor del idioma del país.

L'autor avilesín Xosé Nel Riesgo Fernández ye'l ganador de la presente edición del concursu de relatos que convoca añalmente la Fundación Fernández Lema de L.luarca. El premiu, ún de los más prestixosos de los que se convoquen pa la narrativa en llingua asturiana, tuvo como ganadores nes pasaes ediciones a Xuan Xosé Sánchez Vicente y Esther García respectivamente.

El presidente del Principáu d'Asturies, Vicente Álvarez Areces, consideró difícil qu'una cuarta fuerza política entre nel parlamentu asturianu, en rellación con Unión Progreso y Democracia, partíu que nes últimes elecciones europees sacó más de 17.000 votos n'Asturies. Demientres una entrevista concedida al programa 'Protagonistes Asturies', de Punto Radio apuntó que ve difícil qu'haya una cuarta fuerza política, porque "les xenerales o autonómiques dependen muncho de les candidatures, de les polítiques que se ficieren y del balance que faigan los ciudadanos".

L'alcaldesa de Xixón, Paz Fernández Felgueroso, prometió un agostu "mui redondu" demientres la presentación nel Salón de Receiciones del 'I Festival Xixón 5.40', que va celebrase del 19 al 23 d'esti mes, al qu'unió'l certame de la sidra, sin olvidar la 'Selmanona', la Selmana Grande de Xixón. Como principales grupos, tán confirmaes les actuaciones de los míticos grupos escoceses Shooglenifty y The Real Mackenzies, amás de los asturianos Dixebra y Felpeyu.

El númberu de paraos conseñaos nes oficines del Inem nel nuesu país algamó la cifra durante xunu pasáu de 70.592 persones, lo que supón un descensu de 2.227 paraos menos respective a mayu, un 3,06 % menos, según los datos del Ministeriu de Trabayu y Inmigración. Sicasí, respecto a xunu de 2008, el desempléu aumentó en 21.633 persones, un 44,19 %.

Asimesmo, el númberu d'afiliaos a la Seguridá Social n'Asturies ganó en 365 cotizantes en xunu (+0,09%).
 

La Coordinadora Ecoloxista d’Asturies esixe a la Viceconseyería de Mediu Ambiente la paralización de la cantera de Peridiella, en Belonciu (conceyu de Piloña), perteneciente a Áridos Piloña, una cantera de caliza que se lleva esplotando dellos años y que "nun cumple nenguna de les condiciones ambientales impuestes na ultima tramitación, hai 5 años".

El Conseyu de Gobiernu del Principáu aprobó 17 decretos de proteición patrimonial del entornu de los monumentos prerrománicos asturianos inscritos na llista del Patrimoniu Mundial de la Unesco, asina como de les cueves de la Peña de Candamu y El Pindal, tamién incluyíes hai agora un añu na llista. A lo último, llendóse l'entornu de proteición d'otres ocho cueves con arte rupestre paleolíticu.

La directora xeneral de Salú Pública del Principáu Amelia González, confirmó'l primer casu de gripe A/H1N1 nel nuesu país, nuna moza asturiana de 22 años que viaxó a la República Dominicana. La muyer, perteneciente al área sanitaria VII de Mieres, nun llegó a tar hospitalizada sinón con atención na so residencia y tuvo una sintomatoloxía "suave" y sin "complicación", señaló González. Asina, caltiénense midíes de "contención" y diose una evolución favorable d'esti casu importáu.

Rede Eléctrica d'España (REE) acabó'l próximu añu la rede de 400 kilovatios (kv) en Cantabria, y ente'l 2010 y el 2011 van tar tamién acabaes les actuaciones y meyores nes principales llinies de 220 kv, asegurando con ello la evacuación a la enerxía que se diba producir nos parques eólicos d'esta rexón. Asina, ente les llinies a acabar nel 2010 tán la de Soto-Penagos, que tien yá'l 60% de la obra executada.