La historiadora xixonesa Bárbara García Menéndez algamó la XXX edición del premiu "Juan Uría Ríu", que concede la Conseyería de Cultura, por un trabayu tituláu "El escultor y académico asturiano Juan de Villanueva y Barbales (Pola de Siero, 1681-Madrid, 1765)".
 

El Tribunal Superior de Xusticia d'Asturies (TSXA) ta acabante d'anular el Plan Xeneral d'Ordenación Urbana del Conceyu de Xixón por ser "contrariu a derechu". Esta sentencia acaba de dala a conocer el conceyal d'urbanismu xixonés, Pedro Sanjurjo. La resolución estima la demanda contenciosu-administrativa presentada por cinco particulares contra l'aprobación del 23 de xineru de 2009 del testu refundíu de l'Adaptación de la Llei Autonómica del Suelu y Modificación del PXOU.
 

La Xunta Pola Llingua Asturiana calculó que'l Gobiernu asturianu pue tar perdiendo ente 10 y 15 millones d'euros por nun oficializar l'asturianu, en referencia a les partíes que, nel marcu de la financiación autonómica, van corresponder a les comunidaes autónomes que sí tengan una llingua propia oficializada. Así lo estimó ún de los responsables de la Xunta, Carlos Pulgar, demientres una rueda prensa pa criticar esti fechu.

L'Índiz Xeneral de Precios de la vivienda nel Principáu d'Asturies acusó una cayida del 9,3 por cientu nel segundu trimestre del añu en comparanza col mesmu periodu del 2008, asitiándose un puntu penriba de la media estatal (-8,3%), d'acordies a los datos espardíos pol Ministeriu de Vivienda.

Seis bandes de gaites, ente les que tará la formación del 16 veces campeón mundial de percusión escocés Jim Kilpatrick, van tomar parte esti sábadu nel Festival de Bandes de Gaites de Villaviciosa, estamáu pola formación de la población maliayesa, qu'esplicaron que "esti añu'l festival va a ser un homenaxe a la figura del tamboriteru, tantes vegaes escaecida na hestoria de la música tradicional asturiana". Por esti motivu destaca la presencia del percusionista escocés, qu'ofrecerá una 'Master Clas' nel Teatru Riera de magar les 12.00 hores.

La televisión autonómica de Castiella y Lleón estrenó esti mes de xunetu un informativu en llingua lleonesa, o 'llïonés', perteneciente al mesmu dominiu llingüísticu que l'asturianu, que se ta emitiendo los sábados, a les 20.15 y los llunes a les 10.30.

La Xunta pola Defensa de la Llingua Asturiana denuncia "l’actitú irresponsable y contraria a los intereses de los ciudadanos que ta teniendo'l Gobiernu Asturianu na negociación de la financiación autonómica". Según la XDLLA, el gobiernu asturianu "refuga los millones d’euros (cuasique 30, nel casu de Galicia) que l’Estáu va tresferir a les comunidaes autónomes que recueyen nos sos estatutos la cooficialidá de les llingües propies".

Los diputaos del PP na Xunta Xeneral del Principáu Emilio Rodríguez y Ramón García Cañal pidieron que'l presidente autonómicu, Vicente Álvarez Areces, asuma les sos responsabilidaes pola sentencia del Tribunal Superior de Xusticia d'Asturies (TSXA), qu'anula les plantiyes de profesores de los centros públicos non universitarios.

El Serviciu de Traducción Automática del Instituto Cervantes, que permite traducir testos y páxines web del español al catalán, gallegu, inglés, francés y portugués -y viceversa-, incorporó l'euskera a les sos llingües de trabayu, "una vez superaos los desafíos llingüísticos y tecnolóxicos que presenta esti idioma", informa l'Instituto.

El Serviciu de Mocedá de la Comarca de la Sidra ta acabante d'abrir el plazu de recepción d'escritos pal "IV Concursu de microrrelatos 2009-Lliteratura comprimida". Una convocatoria que quier premia con 600 euros un relatu d'hasta 200 palabres, n'asturianu o en castellanu. El concursu ta empobináu a persones con menos de 35 años y pueden unviase hasta'l 30 de setiembre un máximu de dos relatos.