El rector de la Universidá d'Uviéu, Vicente Gotor, defendió ayer la so política sobre la llingua asturiana na Universidá, demientres la sesión del Claustru na que se diba aldericar sobre la reforma estatutaria, votación que quedó aplazada pa dempués del branu. Esti tema foi ún de los que más tensión xeneró, cola intervención del profesor Félix Fernández de Castro, que se quexó d'una supuesta falta de llibertá pa falar sobre esti tema.

El conceyal de Cultura Tradicional, Jesús Montes Estrada, presentó'l II Alcuentru cola Música Tradicional, dedicáu nesta edición a les bandines, y que va celebrase nel Muséu del Pueblu d'Asturies, del 3 al 5 de xunetu. Montes Estrada, en rueda prensa nel Conceyu, "destacó l'éxitu de la segunda romería de Xixón, con motivu de la festividá de San Pedro, y invitó a disfrutar d'un espaciu "francamente nuevu". L'eventu va axuntar a bandines de toa Asturies, con representación tamién d'Aragón y Lleón.

L’Institut d’Estadística de Catalunya (Idescat) ta acabante d'asoleyar los resultaos de l’Encuesta sobre usos llingüísticos de la población del país mediterráneu fecha nel 2008. Nella conséñase que'l castellanu ye la llingua habitual del 45,9% de la población, mientres que'l catalán lo ye del 35,6 %, baxando del 46% que se rexistraba en 2003. El 12% señala que dambes llingües son d'usu habitual pa ellos.

El preciu de la vivienda llibre baxó n'Asturies un 1,8% nel primer trimestre del 2009, en comparanza col mesmu periodu del añu anterior. La cayida media nel conxuntu del Estáu, en tasa interañal foi del 7,65 superior a la baxada del 5,4%, llograda nel cuartu trimestre del 2008 y a la baxada del 3% esperimentada nel tercer trimestre del añu pasáu.

José Luis Rendueles ye'l ganador de la edición d'esti añu del "Concursu de Cuentos pola Oficialidá del Asturianu", que convoca'l Conceyu de Bimenes, col relatu "Atadures". Esti premiu tien uana dotácion de 800 euros. El segundu premiu, dotáu con 500 euros, llevólu Pablo Rodríguez Alonso col relatu “La viesca de la nieve gris”, mientres que Xosé Lluís Campal Fernández algamó'l tercer premiu, al que se-y apurren 350 euros, con “La pantasma'l pasáu”.

La Tertulia Pachín de Melás, que dende hai unos meses vien desarrollando en Xixón alderiques abiertos sobre bayura de temes sociales y culturales, anuncia pa esti martes 30 de xunu un nuevu alderique col títulu de "Vida, pasión y muerte del teatru asturianu". Nelli van participar Toño Caamaño de Producciones Nun Tris y José Ramón Oliva del grupu de teatru costumbrista de Carbayín. L'actu va tar presentáu por Rubén Ardura.

El Cómite de Solidaridá con América Latina (COSAL) d'Asturies convoca uan concentración pa refugar "el criminal golpe d`estáu n`Honduras, fechu`l domingu 28 de xunu polos militares goriles hondureños y sofitáu pol Congresu, la oligarquía y los medios de comunicación" d`esi país contra`l Presidente Manuel Zelaya. La concentración va ser esti martes 30 a les 19:30, frente al Teatru Campoamor d´Uviéu.

Vecinos de Molleda estudien recurrir a los tribunales pa paralizar el trazáu de l'autovía Llanera-Avilés, pol impautu que tien sobre'l nucleu d'Entrialgo-Xunceo. Los vecinos caltuvieron conceyos cola Direición Xeneral de Carreteres, con tolos grupos políticos del Conceyu de Corvera, col alcalde y colectivos d'ecoloxistes, tres lo qu'entendieron "la necesidá d'actuar con urxencia de manera eficaz y con contundencia col envís de correxir esti irracional trazáu".

El presidente interín del país, Roberto Micheletti, impunxo un toque de queda nacional les nueches del domingu y del llunes que l'Exércitu detuviere al presidente electu, Manuel Zelaya, y lu treslladare a Costa Rica.
   El toque de queda va tar vixente dende les 21.00 hores de la nueche hasta les 6.00 hores de la mañana demientres les dos nueches, según esplicó Micheletti nuna rueda prensa. De la mesma manera, informó de que la midida podía llegar a estendese.

Los votos de los conceyales del PSOE, IU, UICA, Unión Asturianista y Unidá Nacionalista Asturiana valtaron la propuesta del PP pal caltenimientu como oficiales de los topónimos castellanizaos de Guimarán, Logrezana, Pervera, Piedeloro y Prendes, agora sustituyíos por Quimarán, Llorgozana, Prevera, El Pieloro y Priendes, de manera que les cinco parroquies conserven la doble denominación. Sicasí PSOE, IU y UAS abrieron la puerta a una posible modificación si son los vecinos d'esos llugares los que la piden.