El Principáu confirma'l primer casu n'Asturies de gripe A

|

La directora xeneral de Salú Pública del Principáu Amelia González, confirmó'l primer casu de gripe A/H1N1 nel nuesu país, nuna moza asturiana de 22 años que viaxó a la República Dominicana. La muyer, perteneciente al área sanitaria VII de Mieres, nun llegó a tar hospitalizada sinón con atención na so residencia y tuvo una sintomatoloxía "suave" y sin "complicación", señaló González. Asina, caltiénense midíes de "contención" y diose una evolución favorable d'esti casu importáu.

   Asturies y La Rioxa yeren les úniques comunidaes autónomes nes que nun se rexistraren casos hasta'l momentu, siendo ésta la última que se caltién sin diagnosticar nengún afeutáu.

   Según indicó la directora xeneral en rueda prensa, hasta la fecha sólo s'unvió al llaboratoriu de Majadahonda, en Madrid, otru casu amás del actual, que dio negativu de gripe.

   De la mesma manera, señaló que nesti momentu nun hai casos n'estudiu na comunidá, anque destacó que "hai alertes cotidianamente", dao qu'ante síntomes asemeyaos la población acude al mélicu.

   Tamién remarcó que la Conseyería recibió la confirmación del casu esta mañana, dempués de que s'unviare'l pasáu llunes al llaboratoriu madrilanu. La moza llegó de viaxe la nueche del xueves 24 y entamó a esperimentar la sintomatoloxía'l sábadu 26.

   Amelia González calcó na "tresparencia" del so departamentu, asina como na so "responsabilidá" pa ofrecer información confirmada. "Hasta que nun se tienen los resutlaos nun se pue falar, computar nin comunicar como casu", añadió.

   La directora apuntó que ye "esperable" que se rexistren más casos de gripe esti branu, ante'l movimientu de población poles vacaciones estivales. Sicasí, comentó qu'esperen que nun haya nenguna afeición "elevada".

Contador Estadistiques