L'Aconceyamientu de Xuristes pol Asturianu denuncia que'l Principáu convocó un concursu-oposición pal ingresu nel Cuerpu de Mayestros nel que "les espublizaciones rellacionaes cola especialidá feches en cualquier idioma del mundu (vivu o muertu) puen algamar fasta 0,35 puntos nel concursu pal accesu al Cuerpu de Mayestros del Principáu d’Asturies, pero si la llingua emplegada na espublización foi la propia del país, l’asturiana, entós la puntuación másima posible ye de 0,15 puntos".

El conseyeru d'Economía y Facienda del Principáu d'Asturies, Jaime Rabanal, afirmó que cola propuesta presentada pol Gobiernu central respeuto al nuevu modelu de financiación autonómica, Asturies "diba meyorar el términos absolutos y relativos y va siguir asitiada penriba de la media". "La nuesa respuesta al nuevu modelu ye favorable, anque con reserves", dixo'l conseyeru.

La empresa siderúrxica ArcelorMittal, que tien dos plantes n'Asturies, da anuncia de que va reabrir pa esti en setiembre'l fornu altu B de Veriña (conceyu de Xixón). Esti fornu paróse en mayu pasáu por cuenta de la fuerte caída de la demanda d'aceru. L'apertura vien pola disminución del stock d'aceru por mor del aumentu de la demanda del sector del automóvil.

La presidenta de l'Academia de la Llingua, Ana Cano, pidió esta selmana a los cargos políticos a nivel autonómicu que "seyan conscientes de lo que faen y de la so responsabilidá" si nun declaren oficial la llingua asturiana na próxima reforma del Estatutu d'Autonomía, un oxetivu pal qu'anuncia que "va trabayar tolo que puea".

El voceru del Bloque por Asturies, Pablo Fernández, pidió güei al Gobiernu del Principáu, qu'encabeza Vicente Álvarez Areces que "nun acepte'l modelu de financiación propuestu pola Ministra d'Economía", Elena Salgado, por consideralu "escuru, asimétricu y medieval".

El tramu Unquera-Llanes de l'Autovía del Cantábricu va ser una "realidá" nel 2011, según confirmaron los delegaos del Gobiernu n'Asturies y Cantabria, Antonio Trevín y Agustín Ibáñez, tres caltener un conceyu na población asturiana de Llanes. Trevín aseguró que les obres avancen a bon ritmu y nesti momentu trabayen nes mesmes 180 persones y 86 máquines pa que puean cumpliese los plazos previstos pal 2011.

El conseyeru d'Industria y Emplegu del Principáu, Graciano Torre, informó a l'Asociación Nacional d'Empreses del Sector de Dos Ruedes (Anesdor) de la intención del Gobiernu del Principáu de sumase al pidimientu realizáu pol Ministeriu d'Industria d'incrementar coles cantidaes correspondientes a cada casu la compra, nos concesionarios asitiaos na nuesa comunidá, de los ciclomotores y motocicletes que cumplan les disposiciones y suxerencies del Plan Moto-E, igual que se sumó al Plan 2000-E pa vehículos de cuatro ruedes.

Los trabayadores de Factoríes Juliana aprobaron un calendariu de movilizaciones ante la postura de la empresa, que "se niega a llegar a acuerdos porque al so xuiciu Vulcano tien como únicu fin pesllar l'astilleru". "Esiximos a la Sepi que faiga a la compañía cumplir los sos compromisos porque ye la responsable última d'esta situación pola mala venta del astilleru", dixo'l presidente de comité d'Empresa, René Rodríguez, qu'indicó que "Vulcano vino a Xixon sólo pa facer caxa sin interesa-y el futuru de les instalacioens xixoneses".

Los conseyeros de Mediu Rural, Aurelio Martín, y Industria y Emplegu, Graciano Torre, van caltener un conceyu colos representantes d'Albo, nel que van ofrecer llinies d'ayuda económica pa evitar el so anunciáu zarru na factoría de Candás, previstu pal 31 de xunetu, y el treslláu d'esta actividá a Vigo.

El gobiernu asturianu ta acabante d'aprobar na so reunión selmanal del Conseyu de Gobiernu una partida de 696.000 euros pa "la contratación del servicio de traducción de contenidos del portal corporativo del Principado de Asturias" al asturianu y al inglés.