El Plenu de l’Academia de la Llingua Asturiana na so xunta celebrada n’Uviéu a 25 d’esti mes de xunu de 2009 elixó otra vuelta como Presidenta, por unanimidá, a Ana Cano González, que dirixe esta institución dende’l 25 de mayu de 2001. Asimesmo fueron escoyíos los demás cargos de la Xunta de Gobiernu de l’Academia.

Xuegos tradicioanles, amueses de baille asturianu, teatru y conciertos de grupos folk y bandines tradicionales igüen el programa de la romería que'l Muséu del Pueblu d'Asturies de Xixón tien entamáu pa esti sábadu día 27. Lo cercano de la fiesta local xixonesa de San Pedro el llunes 29, fai qu'estos díes se viva un ambiente festivu na Villa de Xovellanos. La cultura tradicional asturiana va aportar lo suyu a la folixa con esta romería.
 

El Fiscal de Mediu Ambiente y Urbanismu, Joaquín de la Riva, manifestó ayer, na Memoria de la Fiscalía 2008, que son "casi inexistentes" los supuestos en que los conceyos remiten a la Fiscalía denuncies de fechos que pudieren ser constitutivos de delitu, a pesar de les importantes competencies que tienen en materies como l'urbanismu.

El secretariu xeneral d'IU d'Asturies, Jesús Iglesias, y el coordinador d'IU d'Uviéu, Alejandro Suárez, aseguraron que los asturianos van pagar un 250% más de lo que debíen pol Palaciu de Xusticia, dao que "según dellos estudios", el preciu que debía costar asciende a 78 millones "una cantidá bastante lloñe de los 176 millones d'euros que se van pagar". La formación va tratar esti "nuevu desacuerdu" col PSOE nel próximu conceyu d'evaluación del pautu de Gobiernu.

La Tertulia Cultural "El Garrapiellu" entama esti domingu 28 de xunu a les 12:00 hores, baxo’l Texu de La Collá nel conceyu de Siero, el tradicional homenaxe que cada añu faen colos vecinos y vecines per San Pedro. Según los organizadores "la idea ye da-y un mayor impulsu a la convocatoria con el obxetivu de conseguir la declaración de bien cultural y natural protexíu pal conxuntu del texu y la ilesia".

El 10 d’agostu ábrese’l plazu de receición d’obres pa la XII edición del Certame de Pintura 2009 – Ilmu. Conceyu de Villaviciosa. Esti añu, con una importante novedá, l’amiestu del Premiu Especial Fundación José  Cardín Fernández, dotáu con 1.500 euros y Diploma. La obra ganadora va pasar a ser propiedá d’esta Fundación. Una collaboración "que-y da un mayor puxu a la dotación económica del certame y afita’l so prestixu".

Los representantes sindicales de los trabayadores de la planta de Conserves Albo en Candás van pidir la mediación de la Conseyería d'Industria pa tratar d'evitar el zarru de la instalación, anunciáu pola empresa la selmana pasada pal próximu 31 de xunetu.Tamién convocaron una concentración énte la planta candasina pa esti próximu llunes a les 13.00 hores.

El Gobiernu asturianu vien d'aprobar un conveniu de collaboración ente la Conseyería de Mediu Rural y Pesca y el Serviciu Rexonal d'Investigación y Desarrollu Agroalimentariu (Serida) pal desarrollu del "Programa de conservación de la raza autóctona Gochu Asturcelta", y el caltenimientu y ampliación del Bancu de Recursos Zooxenéticos de races ganaderes autóctones en peligru d'estinción. Esti conveníu ta dotáu con 50.000 euros.

El plenu del Conseyu de Patrimoniu Cultural d'Asturies ta acabante de declarar la "Fábrica de Loza" de San Cloyo, nel conceyu d'Uviéu, como primer "Bien d'Interés Cultural" (BIC) de calter industrial del nuesu país. Esta fábrica fundóse nel añu 1901 y peslló dafechu'l pasáu mayu, depués de 108 años d'actividá.

Los sindicatos Suatea, CSIF y CC.OO de la Enseñanza pidieron que se depuren responsabilidaes pol "fiascu" de la Carrera Profesional, que s'anuló por una sentencia del Tribunal Superior de Xusticia d'Asturies (TSXA). De la mesma manera exixeron un tratu equitativu y non discriminatoriu nes condiciones llaborales de los docentes asturianos y del conxuntu de los emplegaos públicos del Principáu.