El PSOE aragonés presenta una "Ley de Uso, Protección y Promoción de las Lenguas Propias de Aragón"

El PSOE d'Aragón ta acabante de presentar nel rexistru de les Cortes Aragoneses una proposición de "Ley de Uso, Protección y Promoción de las Lenguas Propias de Aragón", que reconoz el catalán y l'aragonés como "llingües propies y históriques" de la Comunidá, anque nun-yos da estátus de cooficialidá xunto al castellán, que va siguir siendo la única llingua oficial d'esi país.

La llei consta de 27 artículos y prevé que los ciudadanos "d'aquellos conceyos nos que la so utilización sía históricamente predominante" puedan dirixise a les alministraciones y al Xusticia d'Aragón na so llingua materna, anque ta por discutise nes enmiendes si les alministraciones van tar obligaes a contestar neses llingües o namás en castellán. Según afitó'l portavoz del PSOE, Jesús Miguel Franco, ye una llei "diseñada dende Aragón y ensin siguir nengún modelu llingüísticu d'otra comunidá". Nella, el PSOE conseña que la enseñanza de les llingües propies tenga como norma la "voluntariedá" de los pas o tutores y "d'obligatoriedá pa l'alministración educativa". Un "Consejo Superior de las Lenguas de Aragón" va ser l'órganu consultivu que va desendolcar la política llingüística n'Aragón.

L'aragonés fálenlo anguaño ente 5.000 y 10.000 persones nes comarques del norte d'Huesca, mientres que'l catalán ye falao nos conceyos limítrofes con Cataluña por ente 50.000 y 70.000 persones.
 
PAR y PP en contra y IU a favor mientres que CHA nun se pronunció

El Partido Aragonés y el Partido Popular refuguen el testu. Los aragonesistes, socios de gobiernu del PSOE, opónense a la denominación del catalán como "llingua propia" y consideren que deben ser los conceyos los que decidan los nomes de les diferentes modalidaes llingüístiques. El PP, pela so parte, considera qu'esta norma ye "innecesaria y una cortina de fumu" y que "ye complicao falar del catalán y del aragonés normalizáu", a lo qu'añadió que "nun ye una cuestión qu'interese" a los aragoneses. Chunta Aragonesista entá nun se pronunció oficialmente sobre esti testu, mientres que dende IU manifestaron que ye posible que se sumen a esta proposición de llei. Sicasí, esta proposición va negociase durante'l branu y llevaráse a les Cortes na seronda.