El grupu municipal del Partido Popular de Carreño va proponer al Conceyu'l caltenimientu como oficiales de los topónimos Guimarán, Logrezana, Pervera, Piedeloro y Prendes, agora sustituyíos por Quimarán, Llorgozana, Prevera, El Pieloro y Priendes, de manera que les cinco parroquies conserven la doble denominación.

El Principáu concedió l'autorización ambiental a la compañía Asturiana Xeneración d'Electricidá, participada pola irlandesa ESBI, pa la instalación d'una planta de ciclu combináu en Corvera. Esta autorización recueye los aspeutos medioambientales exixibles tanto pol Conceyu de Corvera como pol Principáu, el Gobiernu d'España y la Unión Europea.

El Conceyu de Cangas informa qu'entama la campaña "Nós respetamos el mediu ambiente n’asturianu", midida cola que quier concienciar a la sociedá "en materia de sostenibilidá medioambiental mediante’l repartu pelos comercios de Cangas de bolses de papel recicláu" col logu «¿Tu qué faes pa cuidar el mundu? Reduz, recicla, reutiliza». Esta actividá va desendolcase dende’l 24 de xunu hasta acabar coles existencies

La reforma de la Llei de Función Pública pola que se suprime l'exame obligatoriu en gallegu de les oposiciones quedó aprobada ayer colos votos del PPdeG, mientres que los grupos que conformen la oposición --PSdeG y BNG-- mostraron el so refugu porque entienden que supón un "atentáu" contra la llingua propia gallega. La Xunta xustifica que se suprimen "barreres" y el PP que va volvese al consensu, pero la oposición avisa que sólo lo apoyen los populares

La Conseyería de Cultura va coordinar una nueva "Oficina de Coordinación Cultural y Lingüística" que dependerá de la Mancomunidá Oscos-Eo. La oficina, anunciada pola Directora Xeneral de Política Llingüística, Consuelo Vega Díaz, planificará y executará actividaes culturales y medíes pa favorecer "l'usu social del gallego-asturiano, la so protección y promoción". Esta Oficina entamará la so actividá la próxima seronda n'A Veiga.

Los sindicatos UXT y CC.OO pidieron al Principáu aprobar "lo primero posible" la Llei de Función Pública que dea amparu normativu al desarrollu de la Carrera Profesional y al pagu de los complementos con ella rellacionaes. De nun ver "voluntá política" per parte del Executivu, nun descarten recurrir ante'l Tribunal Supremu la sentencia del Tribunal Superior de Xusticia d'Asturies. Pela so parte Unidá Nacionalista Asturiana, como parte demandante nesti procesu, desixó "respetu a la llegalidá y responsabilidaes a los qu'apoyaron esti despropósitu".

Esti martes 23 de xunu a les 19:30 na Casa los Alberti en Ciañu (conceyu de Llangréu) ye la presentación del llibru "Teatru n'Asturianu 2009", una esbilla obres escrites en llingua asturiana y que van poner n’escena compañíes de teatru integraes en FETEAS. Les obres escoyíes  son "Figenia en La Peruyal" d’Ana Cristina Tolivar Alas, "L’Encierru" de José Ramón López Menéndez y "Cambiu Radical" de Lisardo Suárez Fernández.

Esti domingu entró en vigor el nuevu estatutu d'autonomía de Groenlandia, islla baxo soberanía danesa dende entamos del sieglu XIX. El nuevu estatutu conseña la posibilidá d'entamar un referéndum d'autodeterminación y afita al groenlandés como única llingua oficial del territoriu. Esti fechu coincide cola llegada al poder de los independentistes del "Inuit Ataqatigiit", tres trunfar nes elecciones celebraes el 2 de xunu pasáu nes qu'algamaron 14 de los 31 escaños del parlamentu.

Xuristes pol Asturianu denuncia otra vuelta que nun ta creada la "Unidá de Traducción" anunciada'l 27 d’abril pola Conseyera de Cultura y la Directora Xeneral de Política Llingüística, yá que según-yos comunicó la Xefa del Secretariáu del Gobiernu del Principáu, “no se aprobó ningún acuerdo específico de creación de una Unidad de Traducción en la Dirección General de Política Lingüística de la Consejería de Cultura y Turismo".
 

La Coordinadora Ecoloxista d'Asturies ta acabante denunciar énte la Confederación Hidrográfica del Norte, la Demarcación de Costes y el Serviciu de Protección de la Naturaleza de la Guardia Civil (Seprona) un vertíu asocedíu'l pasáu vienres na ría de Villaviciosa na zona del paséu de la Barquerina, que causó la muerte de cientos de pexes.