Esti sábadu celébrase la XIII Fiesta de la Oficialidá en Bimenes

Un añu más el conceyu de Bimenes entama otra vuelta la "Fiesta de la Oficialidá de la Llingua Asturiana", un eventu que tien nesti sábadu 4 de xunetu'l so día central y col que se quier facer alcordanza de la declaración d'oficialidá del nuesu idioma nel conceyu yerbatu nel añu 1996. Una fiesta qu'axunta dellos actos alredor del idioma del país.

Esti sábadu 4 de xunetu concentra la mayor parte de les actividaes de la XIII "Fiesta de la Oficialidá de la Llingua Asturiana". Esti día a les 11:00 hores ye l'apertura de la VII Feria d’Artesanía y Mercáu de Productos Agroalimentarios. A les 12:00 hores va haber un Pasacais de los grupos folklóricos Los Yerbatos (Bimenes), Oter de Fumos (Valladolid) y Os Pauliteiros (Miranda del Douro) hasta la Casona de los Careaga. Darréu nesi llugar va facese'l pregón, que tará a cargu de Roberto González-Quevedo, escritor, filósofu, antropólogu y Secretariu de l’Academia de la Llingua Asturiana. A les 13:00 hores hai misa n’asturianu oficiada por José Manuel García de Jesús y cantada por "El Corriellu la Pandorga". Yá nel prau de la fiesta a les 13:30 hores ye la Puya’l ramu y a les 13:45 hores l'actuación de los grupos folklóricos enantes mencionaos. A les 14:45 hores ye la "Xinta popular".

Pela tarde de les 16:00 a les 18:00 hores va desendolcase un taller de manualidaes pa neños, a cargu de l’Asociación Sociocultural Afayaivos. A les 18:30 hores va tener llugar el X Concursu de Gaiteros y Gaiteres Mozos. Y finalmente a les 23:00 hores un conciertu cola actuación de "Los Gatos del Fornu" y "Los Ciquitrinos".