L'alcalde de Corvera, Belarmino Moro, encabezó ayer la protesta d'un grupu de vecinos del conceyu, y de los conceyales de los grupos políticos del PP y d'Izquierda Xunida, pero non los del PSOE, ante la sede de la Presidencia del Gobiernu del Principáu, pa esixir el cambiu de trazáu de l'autovía AS-III, que tal y como ta diseñada, diba atravesar les parroquies de Molleda y Solís.

Irlanda va celebrar el segundu referendu pa la confirmación del Tratáu de Lisboa'l próximu 2 d'ochobre, según anunció'l primer ministru del país, Brian Cowen, demientres una intervención nel Parlamentu irlandés.Los últimos sondeos realizaos sobre'l Tratáu de Lisboa apunten a una victoria del sí nesta ocasión.

Greenpeace ta acabante d'asoleyar la novena edición del informe "Destrucción a Toda Costa", correspondiente a esti 2009. Nelli afítase qu'Asturies ye, depués del País Vascu, la comunidá con menos Espacios Naturales Protexíos (ENP) de la so costa. Namás 63,6 km tienen dalguna figura de protección asturiana o europea, lo que representa un 15,6% de la costa. Según Greenpeace estos ENP "sufren anguaño l'acosu del urbanismu al más puru estilu del Mediterráneu, la construcción d'infraestructures y la contaminación".

IU-BA-Verdes d'Uviéu anunció la presentación d'un recursu de reposición contra l'acuerdu del Conseyu de Gobiernu del Principáu de 22 de xunu pol que s'autoriza la soscripción d'un conveniu cola empresa Jovellanos XXI pal arrendamientu de parte de los inmuebles asitiaos na parcela d'El Vascu (Uviéu), con destín al proyeutu de Palaciu de Xusticia d'Uviéu. La coalición considera esti acuerdu "contrariu a derechu y perxudicial pa los intereses xenerales sobre la base de los anteriores fechos y fundamentos de derechu".

La Comisión Europea va financiar el programa de cursos intensivos de les llingües cooficiales del Estáu, destinaes a estudiantes Erasmus, que s'integren nes universidaes nes qu'estes llingües s'usen, y que va desarrollase de magar el cursu 2010-2011. L'organismu esplica qu'estos cursos formen parte del Programa de Deprendimientu Permanente que s'ofrez al país d'acoyida, como "una oportunidá d'estudiar un idioma ente dos y seis selmanes".

Nuna entrevista en RNE, el presidente d'Asturies faló de dellos temes d'actualidá, ente ellos sobre la crisis, de la que dixo qu'Asturies "ta resitiéndola meyor" qu'otres comunidaes, o del AVE, qu'anunció la so llegada pal 2011 con una duración del viaxe ente Asturies y Madrid de trés hores y media. Asimesmo afitó que'l nuesu país tien una "fortísima identidá que, sicasí, siéntese mui española".

El Director Xeneral del Consorciu de Tresportes d'Asturies (CTA), Carlos González, y los alcaldes de los conceyos de Valdés, Navia, Cuaña, El Franco, Tapia, Castropol, A Veiga y Ribadeo presentaron el serviciu que los autobuses van a realizar pela nueche otru branu más nel Occidente del país. La novedá ye que va llegar hasta L.luarca.

Esti sábadu 11 de xunetu a les 18:00 hores va facese la presentación del videoclip “Queimar el cielo”, cantar que forma parte del primer trabayu discográficu del grupu asturianu de rock Bacotexo, tituláu “A máquina del tempo” y cantáu en gallego-asturiano, que fuere nominada al Premiu al meyor cantar del 2008.

El conseyeru de Salú y Servicios Sanitarios, José Ramón Quirós, conseñó que la situación epidemiolóxica en rellación cola afección del virus de la gripe A/H1N1 n'Asturies ye normal y polo tanto la xente "debe facer vida normal". Asimesmo afitó que'l meyor mensaxe que se puede dar a los asturianos ye'l "de tranquilidá y normalidá".
 

El 22 de xunu'l Tribunal Superior de Xusticia d´Asturies dictó sentencia pola qu´anula l´usu del sistema de llibre designación pa los puestos de Coordinador, Asesor y Analista del Principáu d´Asturies, según informa'l Conceyu por Otra Función Pública n'Asturies.