La dirección de Vesuvius abandonó la so propuesta de zarru de la factoría y agora plantega a los sindicatos la reducción de parte de la so plantiya. Asina-y lo manifestó nun conceyu calteníu na sede del Sasec, según confirmó'l secretariu xeneral de Fiteqa-CC.OO, José Luis García Montes. Esti afirmó que los sindicatos garren con "cautela l'anunciu", anque como ye evidente valoren de manera mui positiva esta nueva propuesta que "cambia dafechu la inicial".

El Gobiernu español destinó casi 8,5 millones d'euros a les academies de les llingües cooficiales dende'l 2004, siendo las más beneficiada la institución catalana, que recibió cerca de cinco millones, casi'l 60 por cientu del total de les partíes.

La Banda de Gaites Candás entama esti Vienres 24 y sábadu 25 de xunetu'l so XIII Festival Internacional de Bandes de Gaites Villa de Candás que va celebrase na villa candasina. El Festival tará presentau pol músicu José Ángel Hevia y va contar cola presencia de Bagad Roñsed Mor (Bretaña), Badenoch and Strathspey Pipe Band (Escocia), Banda de Gaitas Vilar de Barrio-Sarreaus (Galicia) y les bandes de gaites de Castrillón y l'anfitriona Candás.

Esti xueves 23 de xunetu a les 19:00 hores va presentase nel Salón de Recepciones de la Casa Conceyu de Xixón el llibru "Discursos llingüísticos y movimientu obreru na Asturies decimonónica", del historiador Rafael Rodríguez Valdés. Esta obra resultó premiada l'añu pasáu na primer edición del Premiu de trabayos d'investigación y ensayu "Fierro-Botas", entamáu pol conceyu xixonés.

El Conceyu de Xixón ta acabante de refugar les alegaciones presentaes por Unidá Nacionalista Asturiana contra la Zona d'Actividaes Loxístiques y Industriales d'Asturies, que va asitiar en Serín y San Andrés. Les alegaciones taben basaes na "falta d'estudiu d'impactu estructural sobre les poblaciones adyacentes, la so afección sobre la Zona d'Especial Protección pa les Aves (ZEPA) del banzáu de San Andrés y pol estudiu de les alternatives a les escoyíes por mor que nenguna d'elles cumplía los requisitos mínimos pa ser zona loxística".

La Directora Xeneral de Política Llingüística, Consuelo Vega, participa esti vienres na presentación d'una campaña informativa n'asturianu de seguridá nes playes. Col títulu de "Midíes de Seguridá nes playes", la campaña busca un doble oxetivu, "l'informativu y el preventivu, ufriendo conseyos a los usuarios de les playes", nesti casu de la Mancomunidá de la Sidra, sobre'l "procedimientu d'actuación más afayaízu énte situaciones de riesgu nes playes".
 

El presidente asturianu, Vicente Álvarez Areces, conseñó que na negociación del nuevu modelu de financiación el nuesu país "llibró una gran batalla, complexa, de les más difíciles que tuvo que llibrar, y quedó nuna bona posición".

El presidente del PP d'Asturies, Ovidio Sánchez, esixó'l desmontaxe y la retirada de les torres d'alta tensión del primer trazáu de la llinia eléctrica que pasa ente Lada, en Llangréu, y Velilla del Río Carrión, en Palencia, nel tramu que pasa pel nuesu país, paralizáu pola UE por razones medioambientales, qu'amás ordenó l'esmantelamientu de les mesmes.

El Grupu de Teatru Refaxu estrena la obra "L’Apocalipsis. El camín que nos marca" de Xosé Ramón Martín Ardines, dientro de los actos desarrollaos alrodiu de la figura del Rei Aurelio por cuenta de los "IV Alcuentros Medievales" entamaos pola Sociedá de Festexos de L’Entregu. L'estrenu va ser esti Viernes 17 de xunetu a les 20:00 horas nel Teatru Municipal de L'Entregu.

Un añu más, l’asociación xixonesa "Tertulia Cultural El Garrapiellu" va facer la perconocía ruta andariega ente Xixón y Cuadonga, que va desarrollase los díes 24-26 xunetu. La salida va ser el vienres 24 xunetu a les 8:30 la mañana dende la ponte de piedra de Deva, xunto’l llavaderu. El preciu ye 65 € pa socios y 70 € pa non socios. Esta ruta tien alrodiu de setenta y cincu kilómetros.