El primer ministru irlandés, Brian Cowen, algamó un acuerdu col so homólogu británicu, Gordon Brown, que va permitir blindar les garantíes xurídiques que la UE ofrez a Berlín pa convocar un segundu referendu sobre'l Tratáu de Lisboa, que probablemente va celebrase en setiembre o ochobre, según anunciaron fontes diplomátiques. Agora'l compromisu deben aceptalu los Ventisiete.
El 'software' de traducción automática d'asturianu, nel que tán trabayando la Universidá d'Uviéu baxo'l patrociniu de la Conseyería de Cultura del Gobiernu Asturianu, pue tener una primer versión en pruebes a últimos del presente añu 2009.
El pactu de gobiernu selláu ente'l PP y URAS-PAS pa gobernar el conceyu de Ponga ta pendiente d'un filu. El voceru de los populares y vicealcalde del conceyu, Gabriel Iglesias, alvirtió de que "sólo van caltener el pautu si Cándido Vega mos cede l'alcaldía. Ye la única garantía que mos val, sinón ye así vamos rompelu", declaró iglesias.
El diputáu del grupu parlamentariu d'IU-BA-Verdes Francisco Javier García Valledor aseguró güei nun entender por qué'l PSOE "ye deslleal y incumple de nuevo dalgunos acuerdos incluyíos nel pactu de gobiernu ente dambes formaciones". Valledor refirióse a l'aprobación, per parte del Conseyu de Gobiernu, de la llinia d'ayudes a la compra de llibros de testu que sigue les mesmes bases d'anteriores convocatories y nun recueye'l carácter progresivu reclamáu por IU y incluyíu, según el diputáu, nel pactu.
El Comité Executivu Rexonal del PP d'Asturies decidió disolver la so actual Xunta Directiva Llocal designando una Xunta Xestora que gobierne de manera transitoria'l Partíu en Mieres, que va tar presidida pol diputáu autonómicu Carlos Galcerán Quirós. Amás, acordóse'l cese de José Coto como voceru del Grupu Municipal Popular nel Conceyu de Mieres, nomando como voceru del Grupu municipal a Luis Miguel Fernández Berandón.
L'Academia de la Llingua Asturiana va recuperar esti mes d'agostu, na XXVII edición de los sos cursos de branu, el d'Ecoloxía y Mediu Ambiente, amás de crear dos nuevos títulos, destinaos a la formación de filólogos en xeneral y de profesores de gallego-asturianu.
Softastur asoleyará esti vienres la versión de software educativu y n'asturianu d'Edubuntu, dirixida al ensiñu de neños ente 3 y 18 años. Softastur organizará xunto con profesores docentes clases pa neños d'ente estes edaes en Llangréu, el vienres día 19 a les 17:00 nel cibercentru de les Escueles Dorado de Sama. Les clases tendrán como llingua vehicular l'asturianu. D'esti mou Softastur y los profesores en llingua asturiana quieren demostrar qu'una enseñanza n'asturianu ye posible, y qu'agora dispónense de les ferramientes afayaíces pa ello.
La Casa Posafuelles, chigre venceyáu a la Xunta pola Defensa de la Llingua Asturiana, entama la celebración del so cuartu aniversariu con un conciertu del grupu DRD, tríu de música folk de cámara que cuenta yá con dos discos asoleyaos. La folixa va ser esti xueves 18 de xunu dende les 22:30 nesti chigre, que ta asitiáu na cai La Cuesta la Vega 10 d'Uviéu.
La sala de lo Contencioso Alministrativo del Tribunal Superior de Xusticia d'Asturies (TSXA) anuló la carrera profesional pa los emplegaos del Principáu por considerala disconforme a derechu, según recueye la sentencia xudicial a la que tuviere accesu Europa Press. La decisión xudicial afeuta a 19.000 trabayadores del sector públicu rexonal, toos menos los 16.000 de la sanidá que yá disfruten de la carrera profesional.
