La Mancomunidá d’El Cabu Peñes convoca'l III Certame de Curtios en Llingua Asturiana. Nesti certame, del que’l ganador de la so segunda edición foi’l cineasta Pablo A. Quiroga Prendes, col so trabayu “Tres Versiones”, l’oxetu ye facer un curtiu en llingua asturiana, de temática llibre, con un llargor d’unos quince minutos.

La diputada d'IX-BA-Verdes, Emilia Vázquez Menéndez, presentó énte'l Tribunal Superior de Xusticia d'Asturies un recursu contenciosu-alministrativu contra la decisión del gobiernu asturianu qu'autoriza la suscripción d'un alcuerdu cola entidá mercantil Jovellanos XXI SAU pal arrendamientu de parte de los inmuebles asitiaos en "El Vasco", Uviéu, llugar del nuevu palaciu de xusticia. Pela so parte'l Director Xeneral de Patrimoniu, Javier Uría, afirmó que “la iniciativa pa dotar a la capital d'Asturies un nuevu complexu xudicial acomódase a la Llei de Patrimoniu del Principáu”.

L'escritor Héctor Pérez Iglesias (Llanera, 1978) algamó la decimusexta edición del premiu de poesía Fernán Coronas, entamáú pola Sociedá Popular La Regalina de Cadavéu, col poemariu "Lo peor del bon tiempu". Esti galardón quier facer homenaxe al padre Galo, autor valdesanu que baxo l'alcuñu de Fernán Coronas foi una de les grandes voces poétiques de la lliteratura del nuesu país.

Unidá Nacionalista Asturiana al traviés del so coordinador Miguel Anxel Díez, adelantó dellos de los actos que va facer la organización nacionalista pal 8 de setiembre, nel que "va celebrar, como yá ye vezu nel nacionalismu d’izquierda n’Asturies, el Día de la Nación Asturiana, una alternativa a los actos oficiales del Día de Asturias".

Esti vienres 21 d'agostu, dientro de les actividaes del Festival Xixón 5"40', van actuar dos grupos yá míticos dientro del panorama de la música folk: los asturianos Felpeyu y los escoceses Shooglenifty. El conciertu va ser a les 22:30 nel escenariu central de Poniente, en Xixón. Sicasí, esta nun va ser la única actividá prevista pa esti día. A les 21:00 hores va emprincipiar el IX Festival internacional de gaites Villa de Xixón nel Pueblu d'Asturies.

Esti vienres 21 d'agostu va celebrase en Baiña (conceyu de Mieres) el Festival "Baiña + o - celta". La formación de folk de Mieres Patriband Folk Orl.lestra abre esti clásicu de les nueches folk asturianes nel que tomen parte la cantante de tonada Anabel Santiago, el grupu folk Llangres, y la banda de rock Dixebra.

El portavoz del Bloque por Asturies, Pablo Fernández, refugó cualesquier fórmula que quixere introducir na sanidá asturiana un sistema de copagu y defendió un "sistema sanitariu universal". Pela so parte Unidá Nacionalista Astuiana, al traviés del so portavoz Faustino Zapico, señaló que "ye insultante" abrir el debate sobre la financiación sanitaria depués de "zarrar el modelu de financiación autonómica".

El presidente'l Gobiernu, José Luis Rodríguez Zapatero, avanzó que l'Executivu va aconceyase colos sindicatos pa facer balance de los primeros díes de tramitación de l'ayuda de 420 euros y valorar "si los términos son afayadizos", y dexó abierta la puerta a un camudamientu de la fecha d'aniciu d'esti subsidiu: "si hai que facer dalgún cambéu, vamos facelu".

El ministru de Fomentu, José Blanco, señaló ante los medios de comunicación, que la fecha del AVE a Xixón y a Uviéu quedará determinada cuando se conoza l'estudiu informativu. "Si güei dixere que la fecha yera nel 2015 o el 2016 taría faltando al rigor que llegará precisáu polos estudios informativos", amestó. Blanco confía na cooperación de toles alministraciones pa definir lo enantes posible l'estudiu informativu que permita finar el trazáu del AVE a Xixón

Meses redondes y conciertos van ser la base de les primeres “Xornaes de la Música Alternativa Asturiana”, eventu "lúdicu-cultural que del 25 al 29 d’agostu va xirar alrodiu de delles escenes musicales alternatives asturianes". Entamao pol Ensame Cultural Sonastur y FNAST.NET, cuntarán coles ponencies y les actuaciones de dalgunos de los protagonistes de los estilos musicales representaos.