Les Xornaes de la Música Alternativa Asturiana, eventu qu'emprincipió esti martes 25 d'agostu, echa'l pieslle esti sábadu 29 cola celebración d'una folixa dende les 18.00 hores nel Centru Social Sestaferia de Xixón (cai Joaquín Alonso Bonet). Xunto a una sardinada popular, va haber un alcuentru de sellos discográficos asturianos, distribuidores alternatives asturianes y publicaciones musicales, amás de música en vivu con gaiteros, percusionistes, curdionistes y pandereteres.

El voceru Los Verdes d'Asturies, Juan Ignacio González, dixo que ye necesario que'l Ministeriu Fomentu faiga una investigación interna sobre'l sobrecoste del enanchamientu del Puertu d'El Musel, en Xixón, d'unos 250 millones. Esi procesu, acordies con Los Verdes tien que dir acompañáu d'una investigación per parte la Fiscalía, ante lo que camienten que que ye "un machacamientu enforma a les arques públiques en beneficiu d'intereses privaos".

Una cita yá clásica nel branu asturianu vuelve otra vuelta. Trátase de la Noite Celta de Porcía, nel conceyu d'El Franco, que va celebrar esti sábadu 29 d'agostu la so XXVI edición. Nesta ocasión el cartel compónenlu Reina del truébano, Mezá, Llan de Cubel, Skama la rede y At first Light, esti últimu grupu formáu por John Mc Sherry, Dónal O'Connor, Francis Mc Ilduff, Rubén Bada y Alan Burke. Too ello a partir de les 22:30 na islla fluvial de Porcía.

La Xunta pola Defensa de la Llingua Asturiana, al cumplise esti añu una década dende de la llegada a la presidencia del gobiernu d’Asturies de Vicente Álvarez Areces, quixo recordar lo que foi la so política no que se refier a la llingua asturiana, de la que dixo que "nun foi nunca a pasar de les declaraciones d’intenciones retóriques y vacíes, de les visiones de la llingua museístiques y acomplexaes" nuna "triste y buxa etapa d’inoperacia política".

La Puela d’Allande vuelve a acoyer una nueva edición del Ruxidoiru, eventu entamáu pola asociación El Rapigueiro. Nél l’asociación busca dende 2005 la difusión de la cultura asturiana con presentaciones de llibros, charres y conciertos, too ello nun ambiente folixeru.
 

El Bloque por Asturies presentó la so propuesta de presupuestos pal próximu exerciciu nuna rueda de prensa na que tamién asoleyóse la nueva imaxe del partíu. Pal portavoz de BA, Pablo Fernández, "deben ser unos presupuestos acordies a la fiscalidá y a la rellación colos ciudadanos, que sían cercanos a la realidá social y económica d'Asturies". Pela so parte Rafael Palacios, director de l'Axencia Asturiana de Cooperación, afitó que "se tan faciendo actividaes que nun son prioritaries" cuando "anguaño hai xente que carez d'un trabayu o una vida digna".

Según un estudiu fechu polos técnicos del Ministerio de Hacienda, 441.588 asturianos tienen unos ingresos brutos mensuales inferiores a 1.100 euros, esto ye  un 56,6% de los trabayadores n'activu. D'estos 395.212 son asalariaos, lo que representa'l 54,8% de los trabayadores con nómina, y tienen un sueldu brutu anual inferior a 13.400 euros. Asimesmo 46.376 empresarios y autónomos nun algamen unos ingresos mensuales superiores a los 1.100 euros brutos, lo que representa'l 77,8% d'estos.

L'Atles de los Bolos Asturianos ye proyectu recién aprobáu pola Conseyería de Cultura na so llinia d’investigaciones sobre Asturies, nel que se busquen datos que permitan trazar delles variables influyentes pa la confección d’un atles que dea desplicación a la bayura bolística asturiana. Esta investigación, empobinada por Carlos Suari, cuenta cola aprobación de científicos de prestixu d’universidaes de Cataluña, País Vascu, Castiella y Asturies y d’axentes de la rede deportiva de los bolos.

Meses redondes y conciertos van ser la base de les primeres “Xornaes de la Música Alternativa Asturiana”, eventu "lúdicu-cultural qu'emprincipia esti martes 25 d'agostu hasta'l domingu 29 y que va xirar alrodiu de delles escenes musicales alternatives asturianes". Entamao pol Ensame Cultural Sonastur y FNAST.NET, cuntarán coles ponencies y les actuaciones de dalgunos de los protagonistes de los estilos musicales representaos.

El diputáu d'IX-BA-Verdes na Xunta Xeneral del Principáu, Francisco Javier García Valledor, dixo que'l presidente del Principáu d'Asturies, Vicente Álvarez Areces, tien de facer de so la responsabilidá pol sobrecoste'l enanchamientu del Puertu El Musel (Xixón) y dimitir por una xestión que significó "qu'Asturies pierda más de 250 millones d'euros".