L'Índiz de Precios de Consumu (IPC) baxó en xunetu nel nuesu país un 1,1 por cientu respeuto al mes anterior (nueve décimes nel estáu) por mor fundamentalmente de les rebaxes, colo que la tasa interañal asítiase na comunidá autónoma nel -1,7%, tres décimes más que nel conxuntu del estáu (-1,4%).

Esti xueves presentóse y entamaron les actividaes del XIII Festival Intercéltico d'Occidente, que va celebrase en Tapia ente los díes 13 y 23 d'agostu. El festival foi presentáu n'Uviéu pol viceconseyeru de Promoción Cultural y Política Llingüística, Jorge Fernández León, en compañía del alcalde de Tapia, Gervasio Acevedo, y del director del Festival, Martín F. Cascudo. El grupu Tuenda y Michael McGoldrick, ente otros, van actuar nel FIDO.

L'asociación en defensa de los derechos de los animales ANADEL convoca una manifestación antitaurina en Xixón pa esti sábadu 15 d’agostu. La protesta va salir de la plazuela San Miguel a les 16:30 hores y tien como lema "Contra la tortura". Esti actu cuenta col sofitu d'organizaciones como Darréu y Fai, y coincide cola celebración nel cosu d'El Bibio de Xixón de la feria taurina de Begoña.

L'asociación de vecinos de Xivares “El Tranqueru” convoca por cuartu añu consecutivu a facer una “Cadena Humana” como símbolu de la so defensa del Altu d'Aboño ante'l desmonte que quier facer l'Autoridá Portuaria de Xixón.L'actu ta programáu pa esti próximu domingu 16 d'agostu a les 18:00 hores nes playes de Peñamaría y Xivares.

La Comisión Europea decidió almitir a trámite la denuncia d'Izquierda Xunida y Los Verdes d'Uviéu escontra'l procedimientu d'axudicación de la construcción del nuevu Palaciu de Xusticia d'El Vascu n'Uviéu acordada pol Gobiernu d'Asturies el pasáu 25 de xunu, acordies colo qu'informó IX.
 

La Conseyería de Mediu Ambiente confirmó la existencia de dos exemplares d'osu pardu cantábricu nacíos de la comunicación xenética ente les poblaciones oriental y occidental. La comunicación ente poblaciones ta considerada como una de les grandes claves pa la conservación de la especie a llargu plazu. Esta identificación foi posible gracies al llabor fecho pol equipu de la Facultá de Biolóxiques de la Universidá d'Uviéu dirixíu pola doctora Ana Domínguez, en collaboración dende 2004 cola Conseyería.

La revista "La Sidra" convoca'l Primer Premiu d'Ensayu "Emilio Trabanco Trabanco". Los trabayos que se presenten tendrán de tar rellacionaos col mundu de la sidra y la cultura desendolcada al so alredor, valorándose especialmente "aquelles obres que sepan destacar la esistencia d’una cultura asturiana de la sidre y que sepan integrar aspeutos concretos de la mesma dientru d’un tou".
 

La Conseyería de Cultura pon en marcha la nueva programación del Circuitu de les Artes Escéniques d'Asturies, qu'integra una ufierta compuesta por 27 conceyos y 39 compañíes y empreses teatrales. Pal segundu semestre del añu hai programaes 168 funciones, que respuenden a toles solicitúes feches polos conceyos al traviés de los sos responsables culturales.
 

El diputáu d'Izquierda Unida, Gaspar Llamazares, criticó que'l Gobiernu tardare siete meses en responder y enriba lo ficiera "de forma ambigua" a la so entruga sobre los plazos y les fases d'execución de la llegada del AVE a Xixón. Llamazares afitó que'l Gobiernu "debe-yos a los asturianos un calendariu concretu d'obres" y amestó que si nun lu da, ye porque "considera que va incumplilu".

La viceconseyera de Mediu Ambiente, Belén Fernández, ta acabante d'anunciar en Teberga que la "Senda de Gran Recorrido Asturias interior", que permitirá percorrer unos 600 kilómetros en 27 etapes pel interior d'Asturies, va terminase en marzu del añu próximu. El camín "Asturias Interior" o GR109, como se-y denomina nel conxuntu de rutes del cordal cantábricu, ye un camín que, dixebráu en 27 etapes, permite percorrer l'interior del país d'este a oeste, dende Panes hasta Santalla d'Ozcos.