La directora xeneral de Salú Pública d'Asturies, Amelia González, anunció que la campaña de vacunación pa la gripe estacional va emprincipiar el 21 de setiembre y va durar hasta'l 23 d'ochobre. Sicasí, esta vacunación ye la que se fai anualmente contra la gripe. La campaña de vacunación contra la nueva gripa A va facese cuando'l Ministeriu lo mande.

El Boletín Oficial del Principáu d'Asturies asoleyó esti martes 11 d'agostu'l "Decretu 104/2009, de 29 de xunetu, pol que s'afiten los topónimos oficiales del conceyu de Siero". La nueva toponimia foi aprobada na reunión selmanal del Conseyu de Gobiernu del pasáu 29 de xunetu. Les nueves denominaciones, aprobaes pola Xunta de Toponimia y yá col preste del Gobiernu asturianu y asoleyaes nel BOPA, pasen polo tanto a tener la consideración de denominaciones oficiales.

El Conseyu de Gobiernu alcordó una retención de créditu por importe de 101 millones de euros como medida pa mantener "l'equilibriu presupuestariu", tres les estimaciones de reducción d'ingresos, un reaxuste que supón el 2,2% del presupuesto actual. Según el gobiernu "la crisis ta incidiendo esti añu con mayor intensidad nos ingresos". El Principáu calcula qu'éstos sían ente un 7 y un 10 % inferior a los previstos, debido esencialmente a la reducción de los recursos tributarios.

El X Premiu Astragal, qu'entama l'Instituto Asturiano de la Juventud en collaboración col Concesu de Mocedá de Xixón, foi pa Cristina Ferrández Box y Lucía Rivero Rodríguez, polos sos proyectos artísticos que podrán vese nel Espaciu Astragal de Xixón, ente l'últimu trimestre de 2009 y entamos de 2010. Cada premiada recibirá 6.500 euros de premiu, colos que tienen de producir los proyectos presentaos nel concursu y editar los catálogos.

La revista "La Sidra" entama otru añu más el so concursu de semeyes. Namás podrán unviase semeyes "rellacionaes cola sidre, la mazana o cualisquier de los sos derivaos y conforme a les carauterístiques descrites nes bases, siendo llibre’l númberu semeyes presentaes". El primer premiu ye de 600 euros, el segundu premiu de 350, y el terceru de 150 €. El plazu de presentación fina'l 15 d’avientu.

El conceyu de Cuideiru va acoyer los actos conmemorativos del Día d'Asturies 2009, que se celebrarán del 5 al 8 de setiembre y qu'esti añu contarán coles actuaciones de Miguel Ríos y "El Sueño de Morfeo". El programa completu presentólu esti fin de selmana na Feria Internacional de Muestres d'Asturies el Viceconseyeru de Promoción Cultural y Política Llingüística, Jorge Fernández León.
 

L'ayuda del llamáu "cheque-bebé" podrá solicitarse a partir del martes 11 d'agostu al traviés de la páxina del Principáu y del teléfonu 012. El Boletín Oficial del Principáu d'Asturies publica güei la resolución coles bases reguladores d'esta convocatoria, aprobaes el pasáu miércoles pol Conseyu de Gobiernu.
 

L'Asociación de Muyeres "Valdés Siglo XXI" del Conceyu de Valdés ta acabante convocar el VI Certame de Poesía "Nené Losada Rico", premiu que lleva'l nome de la escritora valdesana, que finó esti pasáu mes d'abril. El certame afita dos modalidaes, en castellán y asturianu, con un premiu de mil euros pa cauna d'elles. El plazu de presentación remata'l 2 d'ochobre.

El conseyeru de Mediu Ambiente, Ordenación del Territoriu ya Infraestructures, Francisco González Buendía, dixo güei qu'Asturies yá cuenta con un calendariu " definíu dafechu" pa la llegada del AVE. Asina refirióse a la fecha de 2012 como l'añu nel que circularán pela Variante de Payares los trenes d'alta velocidá, llegando d'esta mena a tierres del Principáu.

Asturies foi'l llugar escoyíu por Google pa presentar nel estáu "Google Transit", una nueva ferramienta de planificación de rutes en tresporte públicu. El nuesu país ye'l primeru nel Estáu n'incorporase a esti proyectu. Transit permite a una persona conocer la oferta de tresporte públicu pa dir d'un orixe a un destín, con horarios, recorríos y empreses qu'ufierten el serviciu. Al empar, describe los tiempos totales de desplazamientu a pie hasta la parada o terminal de tresporte, esperes, tresbordos y tiempu de viaxe per Asturies.