Abiertu'l plazu del III Certame de Curtios en Llingua Asturiana de la Mancomunidá d’El Cabu Peñes

La Mancomunidá d’El Cabu Peñes convoca'l III Certame de Curtios en Llingua Asturiana. Nesti certame, del que’l ganador de la so segunda edición foi’l cineasta Pablo A. Quiroga Prendes, col so trabayu “Tres Versiones”, l’oxetu ye facer un curtiu en llingua asturiana, de temática llibre, con un llargor d’unos quince minutos.

La entrega de la documentación pue facese en mano nes oficines de la Mancomunidá con señes: C/Braulio Busto, 2 – 2u, 33430 Candás – Carreño; tfnu. 985872421, n’horariu d’atención al públicu de 9:00 a 14:00 hores, por persona interpuesta, o per corréu certificáu y con acuse recibu (paquete postal exprés), en tal casu tien de remitise per fax al nu 985 87 25 22, dientro del plazu  presentación, el resguardu del mentáu unviu.

Ha presentase nuna carpeta o sobre col títulu: “Tercer Certame de Curtios en Llingua Asturiana de la Mancomunidá d’El Cabu Peñes” asina como’l nomatu del autor. Dientro del sobre ha axuntase un sobre zarráu colos datos del autor (nome, apellíos, señes, teléfonu y nomatu) y títulu del trabayu. La fecha tope pa entregar esti material sedrá’l 1 d’avientu de 2009 (martes) a les 14:00 hores.

Pa más información pue consultar llamando al Serviciu de Normalización Llingüística de la Mancomunidá n’horariu de 10:00 a 14:00 hores y nos tfnos. 985872406 (martes y xueves) y 985883532 (llunes, miércoles y vienres) o per corréu electrónicu a la dirección: llingua@mcabop.com.

Les bases del concursu puen consultase na páxina web de la Mancomunidá d’El Cabu Peñes.