El Gobiernu español va estudiar colos sindicatos si se camuda la fecha d'entrada en vigor de los 420 euros

El presidente'l Gobiernu, José Luis Rodríguez Zapatero, avanzó que l'Executivu va aconceyase colos sindicatos pa facer balance de los primeros díes de tramitación de l'ayuda de 420 euros y valorar "si los términos son afayadizos", y dexó abierta la puerta a un camudamientu de la fecha d'aniciu d'esti subsidiu: "si hai que facer dalgún cambéu, vamos facelu".

   "Cola evaluación qu'exixe y el rigor qu'exixe, tamos dispuestos, dialogando colos sindicatos, a facer más eficaz la midida y el sofitu, dende'l puntu de vista social, y qu'abarque al númberu de persones que lo puean necesitar", esplicó.

   En rueda prensa na so estancia en Lanzarote, Zapatero salió asina al pasu de les crítiques feches sobre'l Gobiernu dempués de qu'una vegada que tea furrulando'l sofitu namái vaya beneficiar a aquellos que cumplan los requisitos necesarios a partir del 1 d'agostu, y non a tolos qu'anguaño los cumplen.

   Acordies colo que dixo, "siempre surde la dulda sobre ú se pon l'aniciu del sofitu", pues se "plantega'l problema de por qué enantes y por qué dempués", a lo qu'amestó que'l Gobiernu camentó que "una posición razonable yera'l momentu de l'aprobación". Amás, recordó que pa situaciones de falta d'ingresos existen les rentes d'inserción que xestionen les comunidaes autónomes.

   Con too, Zapatero volvió aneciar con que "hai qu'atopar un puntu de converxencia social sobre la fecha" y que "el Gobiernu tien siempre la disponibilidá pa evaluar y nel so casu facer un camudamientu de les carauterístiques (del sofitu)", polo que ta "dispuesto a contemplar tolos supuestos".

NUN SE CONOZ EL NÚMBERU BENEFICIARIOS.

   Dicho esto, recalcó, per un llau, que la midida aprobada supón un "gran esfuerciu económicu pa les arques del Estáu" (642 millones d'euros), y, per otro, en que "ye nueva y naide pue determinar el númberu de beneficiarios", magar que de mano, el Gobiernu cifrólos en 340.000 persones.

   "Tenemos de tener toos la prudencia pa facer una evaluación definitiva del resultáu", amestó enantes de retrucar a cuantos llanzaron les sos fleches escontra'l Gobiernu que "sedría inxusto y desenfocao qu'una midida de caláu a esgaya y esfuerciu fuere evaluada namái pola so entrada en vigor".

   "Tenemos que tener prudencia para facer una evaluación definitiva" dixo'l cabezaleru del Executivu enantes d'unviar un nidiu mensax al PP: "Lo que me paez raro ye qu'aquellos que nun propunxeron nada pa los desemplegaos y quieren recortar subsidios pongan el so glayíu en cielu".

UNA MIDIDA ESTRAORDINARIA Y DE CALÁU.

   Tres estes esplicaciones, Zapatero afitó que'l sofitu de 420 euros supón una "midida estraordinaria" y la primera de la so naturaleza na historia de la democracia n'España, a lo qu'amestó que'l coste que puea conllevar ye "xustu y necesariu", al tiempu que comprensible por parte de los ciudadanos.

   En primer llugar, puxo en valor el gran desembolsu que supondrá pa les arques públiques, de 642 millones d'euros, y la so vinculación a itinerarios formativos pa que los paraos puean atopar darréu un emplegu. "Esi ye'l finxu cimeru y pa ello va haber un aconceyamientu'l 26 d'agostu pa iguar la collaboración coles comunidaes autónomes", amestó.