El conceyu d'El Franco va allugar dos cites cola música y el baille pa esti fin de selmana. Esti vienres 7 d'agostu va entamase la VIII Noite Folk d'A Caridá dende les 21:00 hores nel área recreativa de Pormenande. Nella van actuar los grupos asturianos Brisas del Navia y Cádaba, que van tar acompañaos tamién polos grupos Last Order, del Reinu Uníu, y Dealan, de Cataluña.

El pueblu casín de Coballes va celebrar los díes 8 y 9 d'agostu'l so mercáu tradicional. Neses xornaes les cais del pueblu van enllenase d'unos 40 artesanos, de los cuales unos cuantos serán xente del propiu pueblu. Ente toos ellos habrá madreñeru, ferreru, manegueru, talla en maera, abeyes, ente munchos otros. Per otru llau, tamién va poder oyise la música del país cola actuación d'Hector Braga, los hermanos Valleroso y Juanjo Martínez.

El Gobiernu asturianu ta acabante de proponer les "Medayes d'oru y plata d'Asturies 2009", unos galardones que quieren dsitinguir a persones o colectivos representativos del nuesu país y que s'entreguen nuna ceremonia coincidiendo coles celebraciones del Día d'Asturies. Una d'estes distinciones, la medaya de plata, va dir pal míticu grupu Nuberu.
 

El secretariu d'Estáu de Planificación ya Infraestructuras, Víctor Morlán, dixo n'Asturies que la esperiencia encamienta-y ser "precavíu" y que por eso refuga dar nengún plazu pa la llegada de l'alta velocidá a Uviéu o Xixón. Lo que sí punxo seguro'l responsable de Fomentu ye que'l viaxe a Madrid dende Xixón durará unes tres hores, y a Uviéu, dos hores y media. "Prefiero que me critiquen por nun dar plazos a que lo fagan por mentir", señaló apuntando a posibles "problemes" que puean surdir.

El Principaú afitó güei, en Conseyu de Gobiernu, atorgar 500 euros por nacimientu de fíu --el nomináu 'cheque bebé'-- a les families con rentes que nun superen los 45.000 euros anuales. Les beneficiaries serán les families asturianes con fios nacíos ente'l 1 de payares de 2008 y en tol llargor del periodu de 2009.

La Dirección Xeneral de Salú Pública acaba d'unviar a los servicios sanitarios el nuevu protocolu d'actuación pa los casos de virus de la nueva gripe A (H1N1). Nelli,la principal novedad ye qu'en toles sospeches de gripe actuaráse de la mesma manera, con independencia de la cepa de virus causante de la enfermedá. Esto ye que'l diagnósticu será clínicu, ensin necesidá d'unvíu de muestres al llaboratoriu p'análisis virolóxicu.

El conseyeru de Trabayu, Graciano Torre, xustificó que la empresa ArcelorMittal emplegue l'ERE pautáu colos sindicatos, n'alcuerdu con estos. Nesti sen, esplicó que la previsión ye que nenguno de los dos fornos tea funcionando a plenu rindimientu, sinón a un 70 por cientu. Por esti motivu, indicó que si la plantilla ta adautada a que trabayen al cien por cien, "la consecuencia ye la que ye".

El desempléu nel nuesu país baxó en 3.331 persones esti pasáu mes de xunetu, lo que significa un 4,72% en rellación a xunu. Asturies algama la mayor caída del paru nel Estáu, nel qu'amenorgó un 0,58%, según los datos qu'acaba de publicar'l Ministeriu de Trabayu.

La fiscalía abrió dilixencies polos vertíos al ríu Nalón dende'l Pozu Carrio, acordies colo que informó el Bloque por Asturies nuna nota de prensa. La formación reclama darréu, ante la continuidá de los vertíos, la intervención de la Conseyería de Mediu Ambiente. BA recordó que "estos graves vertíos xeneraos nel Pozu Carrio vienen produciéndose al menos dende mediaos del mes de xunetu, constándonos que los díes 30 y 31 de xunetu, siguen produciéndose".

Ediciones Trabe ta acabante de convocar el so "Premiu de Narraciones Trabe 2009" pal que se puende presentar noveles, recopilaciones de cuentos o cualesquier otra forma posible de narración en llingua asturiana. Los trabayos presentaos nun tendrán menos de sesenta páxines y el plazu pa presentalos fina'l día 30 de payares de 2009. El premiu tien una dotación de 3.000 euros.