Softastur acaba d'espublizar la traducción a llingua asturiana d'Akregator, dientro del so proyeutu de software llibre. Akregator ye un amestador de noticies llibre, compatible con feeds (suministru de datos) en formatu RSS y Atom, que permite tar al día de los cambeos nos blogs a los que l'usuariu tea soscritu. Too ello cola interface en llingua asturiana.

Dende esti miércoles 19 d'agostu y hasta'l domingu 23 va celebrase na villa asturiana'l I Festival Xixón 5.40, que va trayer una bona amuesa de la música celta de países como Escocia, Bretaña, Irlanda, Galicia, y por supuesto Asturies. Ente otros, van actuar los grupos escoceses Shooglenifty y The Real Mackenzies, amás de los asturianos Dixebra y Felpeyu y de los irlandeses Kila. Les actuaciones van repartise n'ocho escenarios, de los que dos van ser los principales, la Plaza Mayor y Poniente.

El Delegáu del Gobiernu n'Asturies, Antonio Trevín, dio anuncia de que va facese una ampliación de l'autopista Y, al ser un proyectu impulsáu pola Unión Europea col oxetivu d'afalar "l'usu del tresporte públicu y tresporte de mercancíes, y aforrar combustible". Sicasí, Trevín insistió en que nun va construyise un tercer carril, sinon que "va habilitase un carril p'autobuses y vehículos de mercancíes".

El presidente del PP, Ovidio Sánchez, afaló al Gobiernu del Principáu, en particular al so presidente, el socialista Vicente Álvarez Areces, a que vaiga a la Xunta Xeneral pa esplicar los problemes relativos a la sanidá asturiana. Al paecer de Sánchez, Areces tien de facelo "darréu", por mor de la "alarma" que ta surdiendo ente los ciudadanos sobre'l futuru de la sanidá y los sos problemes presupuestarios.

Ecoloxistes n’Aición d’Asturies conseña que'l "cambéu de la estructura de xeneración eléctrica española fai meyorar la calidá del aire 'de fondu' n'Asturies de forma mui significativa". Según los ecoloxistes, una de les causes ye la disminución de la xeneración eléctrica con carbón, qu'amenorgó alredor d'un 40%.

L'Asociación Cultural "La Marina" de Vidiagu tien abiertu'l plazu hasta esti 20 d'agostu pa inscribise nel III Concursu “Trofeo Hermanos Cueli", empobinao a pareyes de gaita y tambor. Esti troféu va desarrollase esti próximu domingu día 23 d'agostu a les 18:00 hores nel Centru Cultural de Riegu (escuela de Vidiagu), nel conceyu de Llanes.

Según informa'l gobiernu d'Asturies,la tasa estimada de gripe n'Atención Primaria na selmana del 3 al 9 d'agostu foi de 28 casos per 100.000 habitantes, lo que l'asitia perbaxu de la tasa estatal y n'antoxana del "basal epidémicu". D'estos casos, el 72 % de los virus aislaos correspuenden a la nueva cepa A/H1N1. Pel momentu los grupos de población más afectaos son adolescentes y adultos xóvenes.

Entamada pola Conceyalía de Cultura del conceyu de Ribeseya, la Nueche Celta va celebráse esti sábadu 15 d'agostu na Plaza Nueva de la capital rioseyana a partir de les 22:00 hores. Nella van actuar la formación astur-escocesa Hartley, xunto a los asturianos Tuenda y Corquiéu. Hartley ye una formación compuesta por Iain Macleod, mandolinista y compositor escocés y antiguu componente del grupu Shooglenifty, xunto a Simon Bradley y Xel Pereda, integrantes del perconocíu grupu Llan de Cubel.

Por mor del probe balance de captures de la recién finada temporada de pesca del salmón, la Conseyería de Mediu Ambiente "considera prioritariu disponer de mecanismos afayadizos pa meyorar la xestión de la especie y contribuyir a so recuperación nos principales ríos salmoneros asturianos", polo que va asitiar dellos contadores nos ríos Esva, Narcea, Nalón y Cares. La medida permitirá, yá a primeros de 2010, controlar la entrada de salmón d'iviernu nos ríos del país.

Hasta'l 9 de setiembre ta abiertu'l plazu de recepción d'obres pa la XII edición del "Certamen de Pintura-Ilmo. Ayuntamiento de Villaviciosa". Esti concurus ta dotáu con 9.000 euros repartíos en trés premios, el Premiu "Ilmo. Ayuntamiento de Villaviciosa" (3.000 euros) y los Premios Especiales de Cajastur y la Fundación José Cardín Fernández, con 1.500 euros caún.