El presidente'l Gobiernu, José Luis Rodríguez Zapatero, anunció esti llunes que'l Gobiernu sopelexará cambeos impositivos nes rentes de capital y les plusvalíes, y que "tocará y camudará" la deducción de 400 euros nel IRPF pa facer frente a la recesión económica y a la cayida la recaudación.

Nun pudo ser. L'entamu de la Lliga pal Sporting acabó en derrota. Sicasí, cuando enfrente tienes probablemente al meyor equipu de les últimes décades del futbol européu, el F.C. Barcelona, lo normal ye perder. De toes formes los asturianos, pese a los 3 goles a 0, dexaron sensaciones positives en conxuntu, anque habría que correxir urxentemente los despistes nos marcaxes a balón paráu, error qu'al Sporting costó-y los trés puntos.

La Fundación Cultural Asturias, venceyada al sindicatu UXT, ta acabante de convocar el so III Concursu Lliterariu, nel que podrán concursar mozos d'hasta 30 años que sían residentes n'Asturies. Hai una modalidá n'asturianu y otra en castellán, dotaes con 1.000 euros cauna. Les obres nun deben tener un llargor superior a 25 fueyes y el plazu pa unviales entama l'ún d'ochobre y fina'l 31 del mesmo mes.

L’Atenéu Cultural Xuan María Acebal da anuncia de que va espublizar a comuña cola editorial La Cruz de Grau una nueva revista d’ensayu y divulgación que va llamase "Raigañu" y que va tar dirixida por Javier Cubero de Vicente. El conseyu de redacción confórmenlu l’historiador Antón Martínez, el periodista y escritor Inaciu Galán y González, y el músicu Xesús Nel García Muñiz.

La campaña “Doi la Cara pola Oficialidá”, entamada pol Conceyu Abiertu pola Oficialidá, yá tien el sofitu de 9.999 persones nuna iniciativa na que tan dando lliteralmente la cara a favor del reconocimientu oficial pa la llingua asturiana. La última de les semeyes colgaes, fecha nel Taj Mahal, monumentu indiu que ye Patrimoniu de la Humanidá, asitia a esta iniciativa a namás una persona d'algamar los 10.000 retratos a favor de la oficialidá.

Una de les cites más importantes cola música del país, los Alcuentros de Trebolgu, van celebrase finalmente'l 14 de setiembre, en plenes fiestes de San Matéu d'Uviéu. La cita va ser a les 21:30 hores na plaza de la Catedral de la capital asturiana y va contar cola actuación de la banda de gaites "Ciudad de Oviedo", la bandina de música tradicional "La Curuxa" y el perconocíu grupu de rock "Dixebra".

El númberu d'estranxeros asitiaos nel nuesu país duplicóse ente los años 2004 y 2008, siendo un total de 40.804 persones, esto ye, un 3,78 % de la población asturiana según afita l'informe "Mercado de Trabajo de los Extranjeros en Asturias 2008" asoleyáu pol Ministerio de Trabajo. D'ellos, 19.84 son homes y 20.964 muyeres. Por procedencia, un 35,19% vienen d'estaos de la Unión Europea, mientres qu'un 64,81% lleguen d'estaos estracomunitarios.

La reacción asturiana a la invasión de les tropes napoleóniques va ser ún de los temes trataos nel XXXV Congresu d'Historia Militar d'Oporto, en Portugal. L'historiador asturianu Evaristo C. Martínez-Radío Garrido va presentar la ponencia "El protagonismo del pueblo en la guerra de independencia española: el caso de la Alarma Asturiana". Esti congresu, qu'axunta a los meyores especialistes mundiales n'historia militar, trata esti 2009 sobre "La guerra na dómina de Napoleón". 

El direutor de l'Axencia Asturiana de Cooperación al Desarrollu, Rafael Palacios, presentó en rueda prensa l'Alcuentru de Pueblos Indíxenes: Cosmovisión y Resistencia, que ye "una prioridá tresversal y sectorial" de la cooperación asturiana contemplada nel Plan Direutor 2009-2012.

Unidá Nacionalista Asturiana espresó la so preocupación pol fechu de que los plazos pa concretar les cantidaes del nuevu modelu de financiación tean "allargándose ensin motivu dalu" y l'anuncia de qu'Asturies tien de reintegra-y al estáu 190 millones d'euros. Faustino Zapico, voceru d'UNA, criticó que "una vez afitaos los criterios de repartu, nun hai pega pa retrasar nin un día más la información sobre qué cantidaes correspuenden a les Comunidaes Autónomes".