Los Verdes denuncien actuaciones illegales na Turbera de Las Dueñas

Los Verdes d'Asturies denuncien que'l Conceyu de Cuideiru lleva una selmana faciendo grandes obres de desmontes y movimientos de tierres na redolada de la Turbera de las Dueñas y nel límite de la zona de protección del llitoral (zona POLA). Según Los Verdes esta actuación "ye illegal, yá que se ta faciendo contraviniendo la obligación de realizar y aprobar previamente un Estudiu Preliminar d'Impacto Ambiental, y ensin l'autorización previa de los organismos que deben informar o autorizar l'actuación". 

La Conseyería de Mediu Ambiente unvió'l miércoles pasáu una orden de paralización de les obres que "lloñe d'obedecese pol Conceyu, aceleró los trabayos d'esfarraple que se tan faciendo, continuando coles obres trabayando incluso de nueche, a trés turnos". Los Verdes conseñen que'l resultáu "puede ser la desecación de la turbera".

Finalmente afiten qu'esta "manera d'actuar nel llugar onde se pretende asitiar el nuevu Campu de Fútbol, cola coartada agora de realizar un aparcamientu provisional, emplégase pa destrozar la zona d'influencia d'esi Monumentu Natural cola sida de degradar el so valor ecolóxicu. Ye la confirmación d'una actuación que llevamos anunciando dende hai meses, fecha pa favorecer una operación urbanística de la que únicamente beneficiaráse una promotora inmobiliaria".