Consuelo Vega recuerda que'l PP votó a favor del topónimu La Pola, pese a qu'agora lu critique

|

La directora xeneral de Política Llingüística, Consuelo Vega, recordó que'l Partíu Popular votó a favor de la propuesta de revisión de los topónimos tradicionales de Siero, qu'incluyía l'únicu términu de La Pola pa la capital. Tachó de "irresponsables" a la Xunta Llocal de la formación por criticar el llistáu de términos, acabante d'aprobase pol Conseyu de Gobiernu.

   En declaraciones a Europa Press, Vega respondía a les crítiques espresaes polos populares a la propuesta efeutuada pola Xunta de Toponimia.

   Vega recordó que, igual que nel casu del conceyu de Parres, que tien aprobada la toponimia oficialmente dende güei, "el 31 de xunetu del 2008 aprobóse la de Siero nel Conceyu por unanimidá, col votu a favor del PP". Al so xuiciu, l'actitú de los populares "sólo obedez a un intentu de semar cizaña".

   Pa Vega, realizóse un "trabayu seriu y rigurosu demientres dos años, con encuestes y alderiques colos vecinos". "Al día siguiente d'aprobase sal posicionándose a la escontra", criticó. La directora mostró'l so respetu al fechu de que "haya vecinos que nun tean d'acuerdu", pero "lo que tenemos ye meyor que lo qu'había y respuende a la voluntá de lo que diz la xente". Calcó nesti puntu en que'l términu de La Pola "utilízalu tol mundu en Siero".

   Reconoció que "ye imposible contentar a tol mundu, pero yo toi intentándolo", y calcó en que los 40 conceyos nos que yá s'aprobó la revisión de la toponimia'l "procesu foi bien, y sólo hubo dalgunes diferencies".

   Acabó recordando al PP que "lo que ta faciéndose cola toponimia nun ye una actuación d'un programa electoral del PSOE, nin d'IU, sinón dalgo que ta aprobao por unanimidá, tamién col votu de los populares".

Comentarios

Estos del PP son mundiales... en Galicia aprueben una propuesta de la "Galiza Exterior" p'anexionase conceyos del occidente asturianu y llueu equi critiquen la toponimia popular, pa mexar y nun echar gota.

Onde nun hai nun hai y nun se pué pidir

Gabis

Contador Estadistiques