Alex Salmond, primer ministru del Gobiernu d'Escocia y cabezaleru del Scottish National Party (Partíu Nacional Escocés) ta acabante de presentar nel parlamentu d'esi país una serie de proyectos de llei pa esti cursu políticu, ente'l que rescampla un proyectu de llei que tien como oxetivu celebrar un referéndum en 2010 onde los escoceses decidan si quieren siguir nel Reinu Xuníu o bien escueyen independizase.

Sicasí, l'aprobación d'esti proyectu de llei d'un referéndum prometíu polos independentistes del SNP tres la so victoria ellectoral en 2007, va topase col pilancu del rechazu de los trés principales partíos de la oposición: llaboristes, conservadores y lliberales. De momentu'l referéndum namás que cuenta col sofitu de los diputaos del SNP y de los Verdes, que nun algamen la mayoría absoluta na cámara escocesa.

EL SÍ DARÍA'L MANDÁU AL GOBIERNU ESCOCÉS PA NEGOCIAR CON LONDRES LA INDEPENDENCIA

El restu de formaciones quier aumentar l'autogobiernu escocés, pero nun quieren sentir falar d'independecia. Ye por ello que'l primer ministru escocés dixo tar abiertu a la posibilidá d'una pregunta con trés respuestes: una opción afirmativa a la independencia, una negativa y una intermedia qu'escueya algamar más autogobiernu, pero ensín la independencia. Sicasí, la oposición tamién refuga esta opción.

Hai que conseñar que de celebrase finalmente'l referéndum y d'algamar el sí a la independencia, en cualesquier casu la llei británica torga una declaración unilateral d'independencia, polo que la consulta namás que daría'l mandáu al executivu escocés pa entamar les negociaciones con Londres p'algamar la independencia.