La CAC propón construyir pisos d'alquiler baratos pa mozos nel suelu dotacional de los conceyos

El presidente de la Confederación Asturiana de la Construcción, Serafín Abilio, pidó güei a los conceyos asturianos que cedan el so suelu dotacional, el reserváu pa diferentes servicios públicos, a les constructores privaes pa qu'éstes promuevan viviendes barates y pequeñes destinaes al alquiler pa los mozos.

Foi una propuesta que'l responsable de la CAC formuló enantes de la so intervención nunes xornaes sobre vivienda y mocedá organizaes pola Unión Xeneral de Trabayadores.

En declaraciones a los medios, Abilio consideró que se debe trabayar colos Conceyos pa tentar de resolver esti tipu de vivienda, destináu a "un pasaxe concretu de la mocedá". "Tenemos una tradición nesti país, que ye que mos presta la propiedá. El mozu va pretender vivienda protexida pa tener accesu a la vivienda definitiva", comentó. Pero, dende'l so puntu de vista, "hai otru tipu de moza que se quier independizar nestos primeros años y necesita una vivienda con un salariu de 1.000 euros o menos".
 
"Ye difícil executar ehí", consideró. Poro, pido "andechar" esfuerzos colos conceyos. "Ehí, hai más función muncipal de suelos dotacionales, destinaos precisamente esti modelu de concesiones de vivienda n'aquiler por 30 o 40 años. Que puean tener unes rentes ente 220 y 320 euros", exemplificó. "Eso ye otru modelu, el de la vivienda pequeña, d'ente 40, 50 o 55 metros cuadraos, con cocina, salón, habitación y serviciu. Esti tipu de vivienda la xente nun la ve como futura. Necesítala a los sos 25, 26 y 27 años", esplicó.
  
Foi una propuesta que formuló enates de realizar el so análisis de la situación actual en cuanto al mercáu inmobiliariu n'Asturies. Abilio considera que les últimes cifres demuestren que n'Asturies "ta vendiéndose bien", pero ye necesario lliberar el stockaxe, que cifró en 8.000 viviendes. "Nosotros quixéremos que'l 50% del stock tuviere vendíu nel primer semestre del añu que vien. Permitiríamos nel segundu semestre tar con actividá y contratar personal otra vuelta", consideró.
  
Exemplificó cola promoción del barriu de Roces, en Xixón, onde hai unos 1.800 viviendes entamaes y yá se vendieron un 60%. "Eso ye lo que queremos", comentó.
  
Abilio trató de mandar un mensaxe de tranquilidá y optimismu. "Ye cierto qu'hai una crisis", comentó, pero recordó qu'Asturies ye una de les comunidaes menos afectaes y que la crisis n'Asturies ye la metá de grave que n'otres comunidaes con mediu millón d'habitantes.
  
Aprovechó pa presentar a la rexón como modelu pal Estáu en dellos aspectos, como la ellaboración d'un Plan d'Ordenación del LLitoral pa la costa, la creación de Soxepsa, sociedá de xestión pública y privada, y la Fundación Llaboral de la Construción aspectos nos que recordó qu'Asturies foi "referente" pa otres zones.