UICA y UNA llamen a tolos habitantes de Xixón y Carreño a manifestase contra El Muselón

Unión Independiente de Carreño y Unidá Nacionalista Asturiana convoquen una concentración énte l'autoridá portuaria de Xixón el día 12 d'avientu a les12:00 hores, baxo'l lema “Carreño y Xixón escontra El Muselón”, p'amosar la so refuga al proyectu que supón esta obra, “y más en concreto polos perxuicios que van suponer pa Carreño y Xixón de forma más directa”, esclarien.

Los convocantes quieren facer visible la refuga contra la obra d'El Muselón, “que ye la pieza clave d'un proyectu enerxéticu depredador p'Asturies que va dexar más contaminación, pocos puestos de trabayu estables y una producción enerxética con perbaxu valor amestao y que precisen otres zones del Estáu, claramente deficitaries enerxéticamente que se nieguen a producir enerxía poles consecuencies negatives que remanecen d'esa producción”.
 
Ramón Artime, conceyal d'UICA señaló que “la espansión d'El Muselón contra Carreño va suponer la perda d'importantes recursos como la playa de Xibares y Peña María o sobre la pesca y básicamente va trayer más contaminación a un conceyu como'l de Carreño que destaca nos primeros llugares de malures relacionaes cola contaminación.”
 
Mientres que’l conceyal d’UNA, Xuan Rodriguez, declaró que “ye necesario que los ciudadanos de Carreño se faigan respetar y defendan los sos intereses frente a los políticos del parllamentu asturianu que namás tán esmolíos porque Madrid-yos caltenga nos sos puestos, anque ello seya a costa de la dignidá de Carreño y con ello producir enerxía pa otres zones que se nieguen a facelo, lo que ye una postura dafechamente inalmisible.”
 
La portavoz d'UNA en Xixón Yolanda González, indicó que “Xixón tien que se sumar a esta iniciativa, pa que nun se puea dicir que se trata d'un enfrentamientu ente Carreño y Xixón, sinón ente dos modelos productivos, ún que s'afita nes grandes obres qu'apareyen producciones altamente contaminantes ya insostenibles a mediu plazu y xeneradores de mui pocu emplegu, frente a un modelu medioambientalmente viable y orientáu a la creación d'emplegu, más allá de la propia construcción de les infraestructures.”
 
Esta convocatoria ta por sofitada por AA.VV. del Alto Aboño, AA.VV. L'Ablanal, AA.VV. El Regueral, Plataforma Regasificadora NON, AA.VV. El Tranqueru de Xibares, AA.VV de Carrió, AA.VV. d'Albandi, GREEN, PCPE, Asturianistes por Nava y Cofradía de pescadores de Candás.