El presidente del PP d'Asturies, Ovidio Sánchez, refirióse güei a la Conferencia de Presidentes celebrada ayeri, y negó que'l PP realizare bloquéu dalgún. Pel contrario, destacó la "sensatez, rigor y respetu" de la so formaicón, sobre too hacia los más de cuatro millones de paraos qu'hai n'España, frente a la "irresposnabilidá" del presidente del Gobiernu, José Luis Rodríguez Zapatero, que quería aprobar un documentu sobre l'emplegu "que presentó a media tarde".

El temporal de fríu y nieve caltién güei zarráu l'accesu a la carretera CO-4 Cuadonga-Los Llagos, asina como la vía AS-264 en Sotres y llendes con Cantabria.

El Coleutivu d'Internautes pol Asturianu (CODIPA) ye un organización formada por usuarios d'internet que nagüen por navegar pela rede usando la llingua asturiana.  La so primer aición ta siendo l’atropar a miles de persones na petición de que la rede social Tuenti (una de les más usaes pola mocedá asturiano) tenga una versión n'asturianu. En pocos díes cuasi 10.000 usuarios d'esta rede social "esixeron" la versión na llingua d'Asturies y otros 6.000 simpaticen cola idea.

Los sindicatos CSIF, FE-CCOO y Suatea convoquen pal miércoles 16 d’avientu a les 18 hores, una concentración-cencerrada énte la Xunta Xeneral pol trámite parlamentariu de la nomada llei d’Evaluación y les sos Incentivos. Baxo’l llema “Pola calidá de la educación asturiana” los sindicatos denuncien que la llei pretende afitar una discriminación perpetua ente los docentes.

La Estaya Primera de la Sala de lo Penal de l'Audiencia Nacional entamará a xulgar esti martes a los cinco procesaos na causa abierta contra'l diariu Egunakaria, por un supuestu delitu d'integración terrorista, acusación caltenida por Dignidad y Justicia y l'Asociación de Víctimas del Terrorismo, pero non pol Ministeriu Fiscal, que se retiró del procesu. El periódicu quedó zarráu nel 2003 por orde del xuez Juan del Olmo.

La Coordinadora Ecoloxista vien de denunciar énte’l Serviciu de Residuos de la Conseyería de Mediu Ambiente y el Conceyu de Siero, la esistencia d’un esguace illegal na antigua cantera de Calabaza en Siero, nel puntu quilométricu 10 al llau de l'AS 246. Del mesmu mou critiquen la pasividá de les Alministraciones énte una actividá illegal con sustancies peligroses.

La Xunta pola Defensa la Llingua Asturiana ta acabantes d’anunciar los ganadores de los XXV Premios Andrés Solar. Nesta ocasión el Pegollu foi pa la “Ruta del Quesu y la Sidra d’Asiegu”, iniciativa empresarial de calter turísticu a la que-y conceden el premiu pol so apueste decidíu pol idioma a lo llargo de diez años de vida y pol so exemplu de que l’asturianu nun ye un llastre, "sinón daqué que xuega al nuestru favor". Mientres que’l Madreñazu foi pa Mercedes Álvarez González, Conseyera de Cultura y Turismu del Principáu d’Asturies.

El dictame de la ponencia de la Proposición de Llei d'Usu, Proteición y Promoción de les llingües propies d'Aragón aprobóse güei na Comisón d'Educación, Cultura y Deporte de les Cortes d'Aragón col apoyu mayoritariu del PSOE y CHA pa que s'apruebe definitivamente na sesión plenaria d'esta selmana.

L'escultor, pintor y escritor Ángel Nava ye'l galardonáu na XIX edición del Premiu Teodoro Cuesta de poesía n'asturianu, que convoca'l Conceyu de Mieres. El xuráu decidió conceder el premiu al so poemariu 'Cilurnión', presentáu baxo l'apoyu de 'Cilurniu'.

Ánxel Nava, más conocíu nes sos facestes de pintor y escultor, algamó con esti poemariu l'apoyu unánime del Xuráu, destacando'l valor de la obra, según esplicaron los organizadores al traviés d'una nota prensa.

Al traviés d’un comunicáu, Fai! vien d’informar qu’un representante de la so organización llevó les sos postures no que cinca a oficialidá, botellón y ociu, crisis, vivienda ya igualdá a un alderique entamú pol Conceyu de la Mocedá d'Uviéu. Nel debate, que se cellebró nel Auditoriu d'Uviéu esti pasáu vienres 11 d'avientu, participaron les estayes de mocedá de los partíos mayoritarios, asina como otres organizaciones sociales del Conceyu.