Francisco Javier García Valledor entregó güei la so acta como diputáu pol grupu parlamentariu IU-BA-Verdes por "coherencia personal" al nun tar d'acordies cola direición de la organización. Destacó qu'un cargu públicu débese a les decisiones de los órganos de direición de la so fuerza política y debe executar y treslladar diches decisiones porque esto forma parte del más elemental de los funcionamientos democráticos de los partíos.

El secretariu xeneral del Bloque por Asturies (BA), Roberto Colunga, será diputáu na Xunta xeneral, ocupando l'escañu d'IU-BA-Verdes que dexará vacante Francisco Javier García Valledor (IU), que güei anunció la so decisión de dimitir como diputáu.

L’Aconceyamientu de Xuristes pol Asturianu vien de denunciar que la Conseyería de Cultura niégase a da-yos una copia del informe que la Direutora Xeneral de Política Llingüística, Consuelo Vega, dixo qu’unviara al Conseyu d’Europa en xunu.

Unidá Nacionalista Asturiana recrimina al gobiernu asturianu la “insistencia” n'instalar una planta de ciclu combináu na térmica de Gensa, en Trubia. UNA pide al gobiernu asturianu que s'atenga a la llei y a la voluntá de los ciudadanos y archive darréu'l proyeutu de central de ciclu combináu na térmica de Gensa, en Trubia.

Pa Miguel Ánxel Díez, coordinador d’UNA “l'actitú del gobiernu ye llamativa darréu yá que non solo los ciudadanos espresaren delles vegaes la so oposición sinón que'l proyeutu incumple'l PXOU del llugar, amás d'asitiase nuna zona d'eríes”, señala.

L'ex director del diariu vascu clausuráu por orde xudicial 'Egunkaria', Martxelo Otamendi, defendió esti xueves que'l procesu que ta siguiéndose contra él y otros cuatro directivos del periódicu na Audiencia Nacional ye "un empeñu de la Guardia Civil" que "construyó una tesis" contra'l periódicu "enganchándose a esa percha de que too ye ETA". "Ye la Guardia Civil la que se xuega'l so prestixu", defendió.

El Parlamentu Européu pidirá esti xueves a Marruecos, nuna resolución común presentada por tolos Grupos políticos de la Eurocámara, permitir "sin retrasu" la torna d'Aminetu Haidar al Sahara Occidental, devolve-y la so documentación y caltener la integridá física de l'actividsta saharaui, en fuelga de fame dende'l pasáu 15 de payares. Amás, apoyará "toles alternatives humanitaries" pa garantizar el respetu a la so dignidá y el so derechu a aconceyase sin torgues colos sos fíos y la so familia.

El Serviciu de Normalización Llingüística del Conceyu de Siero ta desendolcando una campaña de repartu de tarxetes de Navidá col oxetivu de “fomentar que la xente use la llingua nes felicitaciones que se manden nestes fiestas". Repartiéronse mil tarxetes pa escolinos de los centros de Primaria del conceyu y editáronse tamién 400 exemplares p’adultos.

El partíu rexonalista Unión del Pueblo Leonés (UPL) ta estudiando la posibilidá d’un referendu nun vinculante sobre l’autonomía lleonesa (Lleón, Zamora y Salamanca). Los rexonalistes tomen como base les consultes sobre la independencia realizaes en Cataluña’l pasáu fin de selmana.

Daniel Fernández portavoz de vivienda d'Unidá Nacionalista Asturiana cuida que yera previsible que la política de vivienda fore un fracasu, yá que’l “primer error ye una política orientada a los promotores non a los ciudadanos”. UNA espresó'l so malestar énte les noticies qu'indicaben que nengún ciudadanu accediere a los avales pa llograr hipoteques, “lo que garantizaría l'accesu a una vivienda a les persones con dificultaes pa ello por falta de financiamientu”.

Dellos colectivos sociales y partíos políticos entamen esti xueves 17 d’avientu, a les 20 hores delantre de la Estación de Renfe d’Uviéu, una concentración contra la “ordenanza de convivencia cívica”. La nueva ordenanza contempla multes por utilizar métodos de propaganda como carteles o pegadielles. Mientres que cola sida de refugar el botellón prohíbense xuegos como’l skateboard y el consumu de bebides na cai. Del mesmu mou, castígase con multes la prostitución y la mendicidá en llugares públicos.