Dellos colectivos sociales y partíos políticos entamen esti xueves 17 d’avientu, a les 20 hores delantre de la Estación de Renfe d’Uviéu, una concentración contra la “ordenanza de convivencia cívica”. La nueva ordenanza contempla multes por utilizar métodos de propaganda como carteles o pegadielles. Mientres que cola sida de refugar el botellón prohíbense xuegos como’l skateboard y el consumu de bebides na cai. Del mesmu mou, castígase con multes la prostitución y la mendicidá en llugares públicos.

Una de les entidaes convocantes, el Bloque por Asturies, camienta que Gabino de Lorenzo quier un modelu de ciudá a lo Berlusconi, yá que “en nengún momentu foi consensuada coles organizaciones sociales, polítiques o vecinales, amás de vulnerar drechos y llibertaes recoyíes en normes superiores”. El Bloque tamién diz nun entender como en llugar d’ayudar a mendigos, crear espacios d’ociu pa la mocedá o sofitar sanitariamente a prostitutes va impone-yos multes que “dalgunos por edá y otros por circunstancies de la vida nun podrán pagar”.
 
Mientres, Ecoloxistes n’Aición, que tamién sofita la concentración, pide la retirada de la ordenanza y llama a dir a la manifestación contra “una política prohibicionista y sancionadora”. La organización diz que la ordenanza tien que ver cola crisis qu’emburria a munchos colectivos al paru, colo que se quier evitar “tou tipu de contestación social escondiendo baxo la represión la refuga y la probitú”.

Los ecoloxistes critiquen que’l conxuntu de prohibiciones tea dirixíu haza los más necesitaos; mendigos, inmigrantes y prostitutes. Y esti conxuntu de midíes vien “d’aquellos que tienen nes sos manes los instrumentos pa desendolcar polítiques sociales y d’emplegu qu’eviten estes imáxenes de probitú”.
 
El mesmu mou, la Coordinadora nun entiende como se pue prohibir l’usu de carteles o pegadielles p’anunciar convocatories o critiques sociales, mientres que’l Conceyu “nun se preocupa d’ufrir a los colectivos medios pa esparder les sos idees." No que cinca a la prohibición d’actividaes d’ociu na cai, los ecoloxistes critiquen que se recalifique la Fábrica de Gas, “un espaciu ideal pa utilizar como contenedor cultural del que la ciudá nun dispón”.