La Tarrancha ta acabantes d'asoleyar Ö-3-3 (Otres tres), que ye’l primeru de llarga duración de la banda. Autoproducíu pol grupu y el sellu Algamar Producciones, el discu foi grabáu en Tutú Estudiu por Sergio Rodriguez nel pasáu mes d’ochobre. Por tar el grupu a la contra de la política de la SGAE, el discu tien llicencia Creative Commons y dientro poco tará disponible na rede.

La organización d'esquierda soberanista Fai! vien de cellebrar nel pasáu mes de payares la so II Asamblea Xeneral Estraordinaria, na que'l conxuntu de la militancia fexo un balance del trabayu desendolcáu nel últimu añu, asina como poner al día los testos orgánicos de Fai! al traviés d'enmiendes “que fueron aprobaes en tolos casos per unanimidá”. Depués de dos años de trabayu la organización califica’l so proyeutu como vidable.

El presidente de Venezuela, Hugo Chávez, anunció esti domingu que dio orde al Exércitu de disparar contra los aviones non tripulaos que lleguen dende otros países dempués de la supuesta estrada d'un avión con tecnoloxía estoaunidense dende Colombia nos últimos díes.

El Sporting de Xixón perdió en Valladolid, zarrando l’añu cola tercer derrota consecutiva. A pesar d’entamar ganando, con un gol del lluanquín Luis Morán, a la fin el Valladolid marco los dos goles que-y dieron la victoria.

La Xunta pola Defensa de la Llingua entregó ayeri sábadu en Xixón los sos XXV Premios Andrés Solar. Una gala onde se dio entrega del Pegollu, el premiu positivu, a la Ruta’l quesu y la sidra pol “usu que fai esta iniciativa empresarial de la llingua asturiana, nun exemplu de normalidá y puesta en valor de les nuestres señes d’identidá”. Mientres que’l Madreñazu, el negativu, foi pa la Conseyera de Cultura, Mercedes Álvarez González, por “una política llingüística inexistente”.

El candasín David Artime Coto cola novela “La bufanda” ye’l ganador del últimu Premiu de Narraciones Trabe, un de los premios más prestixoses de la lliteratura asturiana que ta dotáu con 3.000 euros.

El Bloque por Asturies entró nel gobiernu colos oxetivos de parar el banzáu de Caliao, la incineradora, afrontar la crisis dende la esquierda y parar una reforma del Estatutu “regresiva p’Asturies”. Pal Bloque, según espeyó güei’l so portavoz nacional, Pablo Fernández, estos oxetivos tan cumpliéndose polo que van siguir trabayando dende tolos ámbitos y van asumir les nueves responsabilidaes “dende la llealtá a la coalición, el compromisu con Asturies y cola responsabilidá demostrada nos conceyos y nel Gobiernu”.

Portugal va convertise nel octavu país del mundu en reconocer el matrimoniu ente persones del mesmu sexu. El Gobiernu portugués dio-y el preste a la reforma del Códigu Civil que va permitir el matrimoniu gai, anque refuga l’adopción pa les pareyes del mesmu sexu. Midida que foi refugada esplícitamente nuna disposición llegal pol Conseyu de Ministros.