Daniel Fernández portavoz de vivienda d'Unidá Nacionalista Asturiana cuida que yera previsible que la política de vivienda fore un fracasu, yá que’l “primer error ye una política orientada a los promotores non a los ciudadanos”. UNA espresó'l so malestar énte les noticies qu'indicaben que nengún ciudadanu accediere a los avales pa llograr hipoteques, “lo que garantizaría l'accesu a una vivienda a les persones con dificultaes pa ello por falta de financiamientu”.

El portavoz de vivienda d'UNA, Daniel Fernández señaló que “la nuesa organización vien denunciando la obsesión de la Conseyera por sacar les castañes del fueu a los promotores a costa d'unos recursos qu'habríen garantizar l'accesu a la vivienda a los ciudadanos” que según los nacionalistes “tán usándose pa facilitar la venta de pisos a los promotores y garantizar d'esta manera los sos beneficios empresariales”.
 
Según UNA “ye ridículo avalar a xente con problemes de financiamientu pa comprar pisos que s'entamaren nel 2009, que son los más caros” y amiesten que “avalar a daquién pa comprar un pisu asequible de segunda mano nun ayuda a los promotores, que son los grandes beneficiarios de la política de vivienda d'IU”. Pa los nacionalistes esta midida “nun tenía intención d'aplicase, porque ye dafechamente absurda y nun ye otro que meru maquillaxe social, como se fixo notorio, a unes polítiques totalmente insolidaries”.
 
Daniel Fernández indicó que “gracies al gobiernu de PSOE ya IU los asturianos van tener que pagar un 10% más polos pisos de proteición oficial too pa permitir vender el stock de viviendes a los promotores a cargu de fondos públicos” a lo que s'amiesta “la compra de pisos llibres p'arriendu, lo qu'esvia fondos de les polítiques sociales de vivienda” y remató diciendo que “toes estes polítiques refléxense en midíes diseñaes pa nun les aplicar y que son les supuestamente orientaes a facilitar la vivienda a los ciudadanos, como ye'l casu de los avales pa hipoteques, que naide solicitó porque se diseñaren pa que naide les pidiere”.