L’Aconceyamientu de Xuristes pol Asturianu vien de denunciar que la Conseyería de Cultura niégase a da-yos una copia del informe que la Direutora Xeneral de Política Llingüística, Consuelo Vega, dixo qu’unviara al Conseyu d’Europa en xunu. Les causes qu’espón la Xefa del Serviciu Política Llingüística, Mª Antonia Pedregal, pa nun-yos dar el documentu ye que recueye les polítiques del Principáu de fomentu y promoción de la “modalidad lingüística”, sobre les que namás el Principáu tien competencies, polo tanto “excede del derecho de acceso a archivos y documentos recogido en la Ley 30/1992”.

Pasaron seis meses dende’l primer intentu del Aconceyamientu pa conocer el documentu y dende entós “nun hai más que tres escritos de nós razonando’l nuesu drechu al accesu a un espediente de l’Alministración pública y dos d’ellos enguedeyando l’asuntu, mintiendo respeutu a datos conteníos nel Rexistru d’Asociaciones del Principáu d’Asturies y, al cabu, torgándonos la conocencia del cacarexáu informe”, señalen.
 
L’Aconceyamientu entrúgase que tendrá’l documentu que tanto anecien en tapecer y dulden si de verdá unvióse’l documentu al Conseyu d’Europa. Y recuerden los precedentes; la propia denuncia de Xuristes pol Asturianu de febreru de 2009, onde daben a conocer que’l Gobiernu asturianu nun diera respuesta al Gobiernu español, tres qu’ésti pidiéra-y que fixera llegar el so paecer nos puntos que-y afeutaben del informe sobre llingües minoritaries del Conseyu d’Europa. Según l’asociación “si hai un añu mintieron, ¿por qué nun diben facelo agora?”.
 
Xuristes pol Asturianu quier señalar la forma y los términos nos que la Direición Xeneral de Política Llingüística retruca a los argumentos xurídicos de l’asociación. Unos términos que pa l'asociación “descalifiquen a la llingua falando de modalidá llingüística, emplegando la espresión non nel sentíu respetuosu con que lo fai l’artículu 3.3 de la Constitución, sinón nel faltosu acuñáu per aquellos doctrinarios “bien pensantes” conxuraos nos años ochenta (y anguaño felizmente esconxuraos) escontra la llingua del país, que l’aventaben como sinónimu de dialeutu, xíriga o tatarexu”, sentencien.
 
Según l’asociación, la Direición Xeneral de Política Llingüística miente “otra vuelta más” con tala afirmación porque “l’Estatutu d’Autonomía d’Asturies en nengún sitiu espresa la condición del bable/asturianu y la Llei 1/1998 que lu desendolca califícalu como llingua tradicional d’Asturies (artículu 1) por mal que-y siente a la Direutora Xeneral de Política Llingüística, a la so Xefa de Serviciu y al amu del deu que les punxo nel cargu".
 
Mientres que na forma critiquen que sía dafechu en castellán, “cuando los nuestros escritos taben n’asturianu”. L’Aconceyamientu retrucó-y a departamentu de Consuelo Vega tres recibir la primer contestación que llamentaba fondamente'l “pasu atrás” de responder en castellán “siendo asina que dende la década de los noventa -polo menos- foi práutica del talu muérganu l'emplegu del asturianu nesos casos”.

L’Aconceyamientu quier denunciar y dar a conocer la resolución de la Dirección Xeneral de Política Llingüística, resolución que según espón l’asociación nel so últimu escritu a Cultura nun ye propia nin de l’Alministración franquista. Nesi mesmu escritu, fecháu’l 10 d’avientu, l’Aconceyamientu presenta recursu d’alzada, recursu alministrativu al traviés del cual solicitase qu’un órganu alministrativu, nesti casu la Conseyería de Cultura, revise un actu dictáu por un órganu dependiente d’el, Política Llingüística.