La TPA emitirá mañana domingu allanzáu, a partir de les 21.30 hores, la Gala de la Música Asturiana dende l’Auditoriu Teodoro Cuesta de Mieres. Na mesma, la canal pública aprovechará pa entregar los Premios de la Crítica RPA 2009 a les diez meyores producciones asturianes del añu. La gala, na qu’actuarán tolos premiaos, tará presentada pola periodista Sonia Fidalgo y el cantante Fernando Valle Roso.

El sellu autoxestionáu Xunca Records confirmó esti xueves el cartelu definitivu pa la tercer edición del Festival Rude Gaita, nel que van xúbise al escenariu La Tarrancha, Talco y Betagarri. El festival, que vien celebrándose dende avientu de 2007, va tener llugar el sábadu 17 d’Abril na sala Albéniz de Xixón.

La importancia de la muñeira na so espresión como baille y l'ampliu territoriu nel que se dio foi lo que llevó a Andecha Folclor d’Uviéu a dedica-y el segundu tomu del Cancioneru d’Andecha, tituláu “La Muñeira n’Asturies” y que se presentó ayeri na Biblioteca d’Asturies n’Uviéu. La obra ye un trabayu basáu nes sos encuestes de campu y quier ser un soporte más, “nun quier sentenciar más allá de los datos que nós mesmos cotexamos”, señala la coordinadora del llibru, Maribel Álvarez.

Les Cortes d’Aragón aprobaron esti xueves la Llei de Llingües, que nun reconoz la oficialidá del aragonés nin del catalán, pero si la promoción, enseñu y el drechu a dirixise a l’alministración nestes llingües. La norma foi aprobada colos votos a favor del PSOE y Chunta Aragonesista, mientres que’l PP, IU y Partido Aragonesista votaron a la contra.

La Confederación Hidrográfica del Cantábricu (CHC) abrió un espediente sancionador a Hunosa pol vertíu d’agües residuales procedente del Pozu Carrio. Pal Bloque por Asturies (BA) l’anició d’esti espediente ye la prueba de la falta de respetu de la empresa pol mediu ambiente y les agües del Nalón, polo que “esperen y demanden que la CHA adopte una sanción exemplarizante”.

Unidá Nacionalista Asturiana de Cangas pide a los Ayuntamientos d’Ibias, Degaña y Pola de Allande que tomen medidas pa evitar “la pérdida del trabayu de tous ya cada ún de los trabayadores de la mancomunidá”.  Dende UNA sofiten la propuesta de la Casa Conceyu de Cangas de rescatar a parte de los trabayadores de la Mancomunidá y almitilos na Casa Conceyu.

El Conseyeru de Presidencia y portavoz de la Xunta de Castiella y Lleón, el popular José Antonio de Santiago-Juárez, dixo ayeri que la convocatoria d’un posible referendu sobre l’autonomía de Lleón yera “illegal” y que namás l’Estáu podía facelo. Amás, esclarió que na reforma del Estatutu castellán-lleonés protéxose’l territoriu de la comunidá, anque “referíu al condáu de Treviño”.

“Ye un trunfu pal drechu internacional, pa los drechos humanos, pa la xusticia internacional y pala causa saḥaraui”, estes foron les pallabres de l’activista saḥaraui Aminetu Haidar enantes de garrar l’avión medicalizáu que la devolvería a la so casa en L’Ayún, la capital del Saḥara Occidental.  Haidar vuelve y ensin pasaporte español nin marroquín, sinón con un salvoconductu del Gobiernu español qu’acepten en Rabat. Un alcuerdu ente’l Gobiernu español y el marroquín, que cuntó cola participación activa de Francia, punxo fin a 32 díes de fuelga de fame.

A les seis de la tarde, nel Centru Cultura Sala Lorenzo de Colunga, va tener llugar l’actu d’entrega de los premios de la séptima edición del Concursu de Cómic n’asturianu Comarca de la Sidra. La obra futurista “Nel día de la victoria”, del autor mierense José Juan González, ye la ganadora. Del mesmu mou, el xuráu concedió dos accésit de 200 euros caún a la futurista “Creación 3.0”, d’Enrique Carballeira y “Fuñería” del xixonés Diego Bernardo Álvarez, una obra d’ambiente mitolóxicu.

La Coordinadora Ecoloxista d’Asturies convoca un añu más la Buyada Purpurina, premiu que reconoz el llabor d’aquellos que se destacaron nes sos aiciones contra la natura y el mediu ambiente del país.