La Conseyería d'Educación de la Xunta d'Andalucía potenciará l'estudiu del árabe como segunda llingua estranxera en dalgunos Institutos d'Educación Secundaria de la comunidá pa facilitar la integración del alumnáu inmigrante, según recueye'l III Plan Integral pa la Inmigración n'Andalucía 2009-2013 (Pipia).

La Coordinadora Ecoloxista d'Asturies presentó propuestes nel trámite de suxerencies del Parque Eólicu de Pico Lombreiros, cola referencia PE-125 en Grandas de Salime, con siete mlinos de 2 Mw, de 80 metros d'altor y 80 metros de rotor. Ente les sos propuestes, pide que'l conxuntu de 88 instalaciones d'esti tipu previstes pal occidente asturianu, ente les que s'alcuentra la referida, se someta a la Evaluación d'Impactu Estructural pol so "efectu acumulativu" sobre'l paisaxe.

Más de 50.000 persones, unes 100 personalidaes y organizaciones sociales de tolos ámbitos d'España, Suiza y Holanda exixeron güei nun manifiestu la llibertá del director de Greenpeace España y otros tres activistes de la ONG, deteníos el 17 d'avientu demientres una cena de gala ofrecida a 120 líderes mundiales pola Reina Margarita II de Dinamarca, con motivu de la Conferencia de les Partes de la ONU sobre Cambiu Climáticu, que se celebró en Copenhague del 7 a 18 d'avientu.

El Sindicatu Unitariu y Autónomu de Trabayadores de la Enseñanza d'Asturies (Suatea) considera que l'aprobación de la 'Llei d'Evaluación y los sos incentivos', que tuvo llugar güei na Xunta Xeneral d'Asturies, ye la consagración de "una discriminación descarada" nos salarios del senu de la enseñanza pública.

La canal pública ta emitiendo esta selmana especiales de Pieces pa resumir l’actividá cultural n’Asturies en 2009. El programa, producíu por Ámbitu Audiovisual y presentáu por Ana Vanessa Gutiérrez, repasará la música, el cine o la lliteratura que se produxo n’Asturies nesti añu que ta a puntu de finar.

El director de l'Axencia Asturiana de Coooperación al Desarrollu del Gobiernu d'Asturies espresa la so condena ante la situación de "presos políticos" en Marruecos pola "llamentable situación" de la salú de l'activista saharaui de derechos humanos Degja Lachgar, encarcelada en Sale, y la detención de la moza saharaui Fatimetu Mint Rahel Sbai, cuando se dirixía a visitar a la defensora de los derechos humanos Aminetu Haidar.

Alex Freyre y José María Di Bello convirtiéronse ayeri llunes na primer pareya gai en contrayer matrimoniu en Llatinoamérica. Yá lo intentaran el pasáu 1 d’avientu, día mundial de la llucha contra’l sida, enfermedá de la que los dos son portadores, pero la xusticia impidiólo nel últimu momentu.

La boda foi na localidá d’Ushuaia, en Tierra de Fueu, onde la gobernadora de la provincia, Fabiana Ríos, autorizó l’enllaz. La pareya espera que nun haya nueves oxeciones xudiciales y que seya’l primer pasu pal reconocimientu de les pareyes gais en Llationamérica.

 La conseyera d'Alministraciones Públiques y Vocera del Gobiernu, la socialista Ana Rosa Migoya, dixo güei que les lleis que previsiblemente van aprobase mañana na Xunta Xeneral d'Asturies, les que busquen dar cobertoria llegal a la carrera profesional, valdrán pa dar "estabilidá" a los funcionarios que vinieron percibiendo'l pagu a cuenta de la carrera profesional.

El parlamentariu del PNV Íñigo Iturrate afirmó esti domingu que sólo'l 13,5 por cientu de los vascos siguió n'Euskadi'l mensaxe de Navidá del rei por cualquier cadena de televisión y qu'ETB, que lu tresmitió esti añu la primer vez, tuvo diez puntos menos de share que nel 2008 a la mesma ahora.

Iturrate refirióse d'esta manera a los datos ofrecíos de l'audiencia que siguió'l discursu del rei, Juan Carlos, n'ETB, qu'algamó un 24 por cientu del share demientres la emisión.

Yolanda González, portavoz d'Unidá Nacionalista Asturiana en Xixón, llamentó'l pieslle de la piscina de Panchano que cubría les necesidaes del centru de la ciudá. "Nun se pue dexar a una población de 16.000 usuarios potenciales ensin nenguna alternativa de la nueche a la mañana", señaló.

Yolanda González nun pon en cuestión qu'heba causes técniques pa zarrar la piscina, pero achaca al Conceyu que “nun s'esmoleciere lo más mínimo por buscar alternatives reales a esti pieslle, porque yera evidente que l'allugamientu de la piscina facía mui difícil la so continuidá nel tiempu”.