La Fundación Osu Asturies afirmó güei que demientres 2010 siguirá trabayando nel Proyectu de Manexu Reproductivu d'Osos Pardos en Cautividá, col apoyu y asesoramientu científico-tecnolóxicu del Grupu d'Investigación en técniques de reproducción asistida de la Universidá de Lleón y cola collaboración de la Conseyería de Mediu Ambiente. Asina destacó qu'esti añu pue ser mui importante pa corroborar l'éxitu d'esti programa si se confirmare que la osa Tola ta preñada.

L’asociación cultural La Caleya va entregar esti sábadu 26 d’avientu, los premios del Certame Lliterariu Reinu de Llión. L’actu va entamar a les seis de la tarde na biblioteca d’Estorga.

El certame, que cuenta col sofitu del Conseyu d’Estorga, Diputación ya Institutu Lleonés de Cultura, ufre un premiu de 400 euros a los primeros clasificaos de les modalidaes de poesía ya relatu curtiu.
 
Na entrega de premios, los galardonaos lleerán fragmentos de les sos obres y habrá una actuación musical.

El portavoz d'Unidá Nacionalista Asturiana, Faustino Zapico, fixo llegar una felicitación al Conceyu de L.lena pola creación de la Comisión de la Memoria Histórica y al empar solicitó al Gobiernu d'Asturies que tresllade esta iniciativa al ámbitu asturianu. Los nacionalistes dicen nun entender “la llercia qu'hai a una midida esclusivamente humanitaria como ye que los familiares sepan ónde s'afayen los sos seres queríos, lo que nun habría molestar a naide”.

L'Asociación de Víctimas del Terrorismo (AVT) y Dignidad y Justicia avisaron esti miércoles que l'Estáu tendrá qu'indemnizar con 60 millones d'euros a los responsables del diariu Egunkaria si salen absueltos nel xuiciu que se celebra contra ellos na Audiencia Nacional por un supuestu delitu d'integración n'ETA.

El presidente bolivianu, Evo Morales, propunxo esti miércoles convocar el Conceyu Mundial de los Pueblos sobre'l Cambiu Climáticu'l próximu mes d'abril tres calificar de "fracasu" el reciente conceyu de Copenhague, col únicu oxetivu inicial d'algamar un acuerdu vinculante pa reducir les emisiones de CO2 a nivel global más p'allá del 2012, cuando acaba'l Tratáu de Kioto.

El mandatariu aymara esplicó que'l combate contra'l calentamientu global debe guiase polos principios de defender la vida y la humanidá, asina como los derechos de la Madre Tierra.

El Tribunal Superior de Xusticia de Dinamarca refugó esti miércoles el recursu presentáu pola organización ecoloxista Greenpeace pidiendo la lliberación del so director n'España, Juan López Uralde, y d'otros trés activistes, de manera que los cuatro tarán en prisión polo menos hasta'l próximu 7 de xineru.

El Conceyu d’Avilés daba ayeri anuncia de que taben acabantes de recuperar un segundu orixinal del Fueru d’Avilés, el primer testu alministrativu n’asturianu. El documentu, del que yá se tien un exemplar del añu 1155, taba perdíu dende 1808 y comprólu’l Conceyu por 72.000 euros a los actuales propietarios. El Conceyal de Cultura avilesín, Román Álvarez, dixo que’l testu “contribuirá al conocimientu de la nuesa historia y la d’Asturies”.

El Bloque por Asturies púnxose en contautu a traviés d’una carta con Javier Guillén, Direutor de la Vuelta Ciclista a España, pa recorda-yos a los organizadores de la prueba ciclista qu’usen los topónimos oficiales nes etapes asturianes. Por ello encamentaron a la Oficina de Política Llingüística pa que faiga tolo posible p’algamalo, señalaron al traviés d’un comunicáu.

Los sindicatos educativos SUATEA, CCOO y CSIF vienen de denunciar que’l Principáu siga alantre cola tramitación parlamentaria de la Llei d’Evaluación Docente y los sos Incentivos. Poro, vuelven pidir que los grupos parlamentarios reflexones sobre la llei, reseñando que “vulnera drechos ya impón un sistema d’evaluación alloñáu de les verdaderes necesidaes del sistema educativu”.

Fai díes saltaba a los medios de comunicación la polémica de cómo les instituciones llingüístiques recoyíen definiciones de términos que resultaben insultantes pa dellos coleutivos. Asina, l'Asociación pa la Recuperación de la Memoria Histórica pidía-y a la RAE que camudara la so definición de “fascismu” (tendencia totalitaria). Del mesmu mou, la Real Academia Galega alcordaba cola asociación de gais y lesbianes Colegas remocicar les definiciones del so diccionariu con connotaciones despeutives pal coleutivu LGTB.