UNA pide que se garantice a los ciudadanos del centru de Xixón un equipamientu deportivu públicu

Yolanda González, portavoz d'Unidá Nacionalista Asturiana en Xixón, llamentó'l pieslle de la piscina de Panchano que cubría les necesidaes del centru de la ciudá. "Nun se pue dexar a una población de 16.000 usuarios potenciales ensin nenguna alternativa de la nueche a la mañana", señaló.

Yolanda González nun pon en cuestión qu'heba causes técniques pa zarrar la piscina, pero achaca al Conceyu que “nun s'esmoleciere lo más mínimo por buscar alternatives reales a esti pieslle, porque yera evidente que l'allugamientu de la piscina facía mui difícil la so continuidá nel tiempu”.

Nesti sen, UNA camienta que l'alternativa de mandar a los usuarios a otros centros municipales france dafechu col principiu de proximidá, básicu nesta triba d'instalaciones, mentanto que'l conveniu con Talasoponiente nun pue ser más que temporal y pa dalgunes actividades, porque ye un mal camín sustituir equipamientos públicos por convenios con entidaes privaes.
 
Yolanda González acusó al gobiernu municipal de “poca previsión, darréu qu'hebo tiempu más qu'abondo pa estudiar alternatives de futuru que dean soluciones a los usuarios, yá que nun se pue actuar namás cuando nun hai más remediu".
 
Pa UNA'l Conceyu actúa “a escondidielles de los vecinos y ensin da-yos una solución convincente, lo que crea ente los xixoneses incertidume énte la perda d'un equipamientu”. UNA entrúgase si'l gobiernu municipal "va escaecer ensin más les firmes en contra del pieslle, porque esta vegada nun paez que puedan dicir que correspuenden a malos vecinos que namás piensen en sí mesmos, que ye la única respuesta que PSOE ya IU dan a los que criticamos la so pésima xestión”.