A la fin los blogueros asturianos, encabezaos pola páxina Trayasgaya, van votar pol meyor blogue n’asturianu del añu 2009. Alrodiu del ún de xineru esperen asoleyar la páxina onde va poder votase demientres tol mes, pa espublizar los resultaos nel mes de febreru.

Miles de gallegos respondieron a la convocatoria de “Queremos Galego”, asociación qu’engloba a organizaciones y partíos políticos en defensa del idioma gallegu. L’asociación convocó esta tarde una concentración contra la derogación del decretu de la llingua nel enseñu, que güei entama la Xunta de Galicia, en manes del PP d'Alberto Núñez Feijóo, cola presentación del borrador del nuevu decretu. Una nueva norma que previsiblemente amenorgara la presencia del gallegu nel sistema educativu.

 
La Coordinadora Ecoloxista d’Asturies vien de manifestar al Principáu d’Asturies la so posición al proyeutu d’investigación minera nel Monte de Cobayu en Ribeseya. Los ecoloxistes camienten que la mina taría averada a una zona habitada y a la Ría, espaciu protexíu.

Dos hores y media más cada día d’información, l’entamu de la programación a partir de les 6.45 hores, l’aumentu de la emisión de “Mediodía entero” y la incorporación sele de seis nuevos programes son les novedaes de la radio pública pa 2010. Ente elles, l’estrenu d’un microespaciu informativu n’asturianu que va emitise tres veces al día.

La Conseyería de Mediu Rural y Pesca, dende fai unos díes, ta rotulando los sos vehículos de forma billingüe: el llau esquierdu n’asturianu y el drechu en castellán. De la mesma manera los carteles de les obres promovíes pola Conseyería van usar l’asturianu en xunto col castellán.

Esta actuación quier apoyar l’usu y la promoción del asturianu y va siguise d’otres, como la edición de publicaciones, la señalización d’oficines, etc. La Conseyería ta encabexada pol comunista Manuel Aurelio Martín González.

El Coleutivu Ecoloxista d’Avilés denunció énte’l Principáu y la Guardia Civil l'apaición de nueves manches d’hidrocarburos alcontraes na marxe drecha de la Ría d’Avilés. Los ecoloxistes esperen que’l Principáu recueya muestres p’analizales y asina castigar a los responsables.

El frente 48 de les Fuerces Armaes Revolucionaries de Colombia (FARC) denucnió l'entamu d'un supuestu plan de desestabilización per parte del Gobiernu d'Álvaro uribe contra'l mandatariu ecuatorianu, Rafael Correa, que desarrollaríen grupos parlamilitares na frontera común.

Sobre una ventena de miembros de la Plataforma d'apoyu a la investigación con célules madre uterines n'Asturies enzarráronse güei martes, dende les 11.30 hores, nes dependencies del Institutu Nacional de la Seguridá Social cercanes al paséu de Begoña, pa reclamar a los políticos asturianos qu'abran un alderique sobre esti descubrimientu y lu apoyen dende les diferentes alministraciones a les que representen.

La Xunta Xeneral del Principáu aprobó güei, colos votos del PSOE y IU-VA-Verdes, y el refugu de los diputaos del Grupu parlamentariu del PP, el Presupuestu pal 2010. Unes cuentes qu'ascienden a 4.428 millones d'euros, un 0,77 por cientu más que'l presupuestu del 2009. Si s'inclúi'l sector públicu'l presupuestu consolidáu asciende a 4.600 millones d'euros.