L'Axencia Asturiana de Cooperación al Desarrollu llamenta la situación de los "presos políticos" en Marruecos

El director de l'Axencia Asturiana de Coooperación al Desarrollu del Gobiernu d'Asturies espresa la so condena ante la situación de "presos políticos" en Marruecos pola "llamentable situación" de la salú de l'activista saharaui de derechos humanos Degja Lachgar, encarcelada en Sale, y la detención de la moza saharaui Fatimetu Mint Rahel Sbai, cuando se dirixía a visitar a la defensora de los derechos humanos Aminetu Haidar.

Según esplicó Palacios al traviés d'una nota de prensa, frente a les reivindicaciones pacífiques de la población saharaui pa exixir el so derechu al llibre autodetermín y la independencia, les autoridaes marroquís intensificaron la vixilancia sobre les cases de los activistes saharauis y impíde-yos visitar les ciudaes del Sáhara Occidental y el Sur de Marruecos.

Añadió que tamién s'intensificaron la vixilancia sobre los sos movimientos col oxetivu de torgar que denuncies les "graves y sistemátiques" violaciones de derechos humanos que les autoridaes marroquís cometen contra la población civil saharaui nes Zones Ocupaes, el sur de Marruecos y nes universidaes marroquís.
  
"Siete defensores saharauis de derechos humanos alcuéntrense, dende'l pasáu 8 d'ochobre del 2008, deteníos nes cárceles marroquís, por visitar de manera llegal les Zones Lliberaes de la RASD y los campamentos de refuxaos saharuis de Tinduf (Arxelia) pa alcontrase coles sos families, de les que se separaron hai 34 años por mor de la invasión marroquí al territoriu saharaui", apuntó Palacios, qu'añadió que s'alcuentren na cárcel marroquí de Salé, "sometíos a tou tipu de tortures físiques y psicolóxiques".
  
Ante esta situación, Rafael Palacios exixe la puesta en llibertá de Degja Lachgar y los sos seis compañeros, asina como la lliberación de tolos presos políticos saharauis nes cárceles marroquís y la revelación del paraderu de más de 500 saharauis desapaecíos.