Migoya diz que les lleis que s'aprobarán mañana darán "estabilidá" al personal de l'Alministración autonómica

 La conseyera d'Alministraciones Públiques y Vocera del Gobiernu, la socialista Ana Rosa Migoya, dixo güei que les lleis que previsiblemente van aprobase mañana na Xunta Xeneral d'Asturies, les que busquen dar cobertoria llegal a la carrera profesional, valdrán pa dar "estabilidá" a los funcionarios que vinieron percibiendo'l pagu a cuenta de la carrera profesional.

El Gobiernu rexonal tuvo qu'ellaborar eses normes pa dar cobertoria al citáu pagu, pol que'l Tribunal Superior de Xusticia d'Asturies (TSXA) determinó que nun existía soporte xurídicu pal mesmu. L'oxetivu ye que les normes entren en vixencia'l 1 de xineru del 2010.

Trátase de los proyectos de llei del Principáu d'Asturies d'Evaluación de la Función Docente y los sos Incentivos y del proyectu de Llei del Principáu d'Asturies 3/1985, de 26 d'avientu, d'Ordenación de la Función Pública, pa la regulación de la carrera horizontal.
  
"Son dos lleis que van a dar estabilidá xurídica a incentivos económicos y que perciben los emplegaos públicos d'Asturies, que van lligaes a procesos de meyora de la prestación de servicios que se da a los ciudadanos", señaló Migoya, que destacó la importancia de dar "cumplimientu" a lo estipulao pola sentencia del TSXA. Los trabayadores afectaos, que recibieorn l'incentivu, son unos 14.000.