La Xunta aprueba, colos votos del PSOE y IU-BA-Verdes, el Presupuestu pal 2010 qu'asciende a 4.428 millones

La Xunta Xeneral del Principáu aprobó güei, colos votos del PSOE y IU-VA-Verdes, y el refugu de los diputaos del Grupu parlamentariu del PP, el Presupuestu pal 2010. Unes cuentes qu'ascienden a 4.428 millones d'euros, un 0,77 por cientu más que'l presupuestu del 2009. Si s'inclúi'l sector públicu'l presupuestu consolidáu asciende a 4.600 millones d'euros.

Les cuentes aprobáronse güei dempués de que'l Parlamentau asturianu refugare la pasada selmana, colos votos a la escontra del PSOE y d'IU, la enmienda a la totalidá del testu presentada pol PP. Güei, les dos formaciones qu'integren el gobiernu volvieron a mostrar el so refugu a les enmiendes parciales presentaes pol grupu parlamentariu del PP.
 
Les que sí s'incorporaron al proyectu presupuestariu fueron les enmiendes parciales presentaes tamién de manera conxunta per parte de los grupos del PSOE y d'IU, un total de diez enmiendes, de les que siete refiérense a la Llei de Presupuestos y trés a la d'acompañamientu.

Demientres la so intervención inicial, el conseyeru d'Economía y Facienda d'Asturies, Jaime Rabanal, afirmó que'l Presupuestu presentáu pol Gobiernu pretenden caltener qu'Asturies puea asitiase en meyor situación relativa al acabar el próximu añu. "Esti presupuestu reflexa lo que ye esti Gobiernu", dixo Rabanal, que pidió'l votu favorable pa les cuentes que "Asturies necesita y merez".
 
VOTU CONTRARIU DEL PP
  
El PP votó pela so parte a la escontra. El diputáu del so grupu, Joaquín Aréstegui, aseguró que les cuentes tán orientaes pel camín contrariu dafechu al qu'hai que siguir pa superar la crisis. "El Gobiernu equivócase con total exactitú, tomando los derroteros contrarios a los que tomen tolos países pa salir de la crisis", dixo Aréstegui, qu'añadió qu'esti presupuestu nun ta ellaboráu pa salar de la crisis a los asturianos, sinón pa salvar al Gobiernu.
  
A xuiciu del PP, con estes cuentes lo que va algamar ye que los asturianos tengan tovía más dificultaes pa superar la situación actual. Dixo amás que s'acude a un adeudamientu sin llendes, provócase desánimu y desaliendu d'instituciones tan importantes como la Universidá y reduciendo la inversión productiva.
  
"Vamos na direición contaria a tolos países", dixo Aréstegui, qu'indicó que se recorten tamién les partíes destinaes al fomentu del emplegu nun momentu tan complicáu o s'eliminen les ayudes a la compra de  vehículos porque aseguró qu'esta partida nun existe nel Presupuestu. Criticó tamién la eliminación de les ayudes a la natalidá.
  
La tamién diputada del PP, Ana Barrientos, consideró una "total falta de respetu" que los presupuestos s'alderiquen nel Parlamentu "tarde, mal y nunca", y sobre too que'l informe del Conseyu Económicu social-yos lu facilitaren una vez entamáu'l Plenu. "Impresentable, igual qu'impresentalbes son dalgunes partes del testu articuláu qu'usté omite na so intervención", protestó.
  
Pela so parte, el diputáu d'IU-BA-Verdes, Jesús Iglesias, retrucó al PP que la inversión sube nes cuentes; que se dediquen recursos a la llucha contra'l desemplegu o que si se-y dota a la Universidá de recursos y pidó amás a los populares que nun confundan conceptos de cara a la ciudadanía.
  
"Les sos enmiendes parciales desmienten que'l presupuestu nun seya la respuesta adecuada a la crisis y desmienten los argumentos de la so enmienda a la totalidá", dixo Iglesias, qu'añadió que los cambios que propón el PP nes enmiendes parciales son "símbolos y actitúes cosmétiques que nun respuenden a la crisis".