Roberto Colunga; “Voi falar asturianu con normalidá dientro del Parlamentu porque la llei permíteme facelo”

|

Roberto Colunga Fernández (Xixón, 1970), ye’l Secretariu Xeneral del Bloque por Asturies dende la so fundación y va ser el sustitutu de Valledor na Xunta Xeneral. Anguaño ye asesor de cultural tradicional y llingua na Xunta de Gobiernu del Conceyu de Xixón, dende onde impulsó’l Festival Xixón 5º40’. Foi miembru de la Xunta Rectora Tradicional de la Fundación Municipal de Cultura y de la Universidá Popular de Xixón. Dientro del asturianismu foi miembru fundador d’Izquierda Nacionaliega d’Asturies y del propiu Bloque por Asturies. Asturies.com faló con él sobre’l so futuru y el de la formación a la que va representar nel Parlamentu.

¿Qué opinión tien de la dimisión de Francisco Javier García Valledor?
 
Valledor tuvo los motivos que’l consideró pa dimitir. Namás pueo dicir que foi una persona honesta que trabayó tolo que pudo na Xunta Xeneral.
 
¿Cómo s’enteró que diba ser el so sustitutu?
 
Podía pasar en cualesquier momentu, por una aición de gobiernu u otra cosa. Yo yera’l siete na llista eleutoral d’IU-BA-IU, el siguiente a Valledor. Cola so dimisión yera nidiu que’l Bloque por Asturies diba entrar na Xunta Xeneral.
 
¿Podemos dicir que tamos énte un fechu históricu al tener el primer diputáu nacionalista na Xunta Xeneral?
 
Ye evidente. Tomámoslo con optimismu y ganes de trabayar, motivaos por esi fechu históricu.
 
Dicía fai díes n’otru mediu de comunicación que diben mirar con llupa'l so llabor. ¿A quién se refería; a la sociedá en xeneral o al asturianismu en particular?
 
Voi ser el primer diputáu nacionalista na Xunta, ábrese un nuevu camín y la sociedá va mirar que capacidá tenemos de trabayar ya iguar los problemes d’Asturies.
 
¿Ye partidariu d’abrir la coalición a otros fuercies de la esquierda asturianista?
 
La coalición siempre tuvo abierta. En 2003 fíxose l’alcuerdu ente Izquierda Xunida y Bloque por Asturies, cuatro años más tarde entraron a formar parte Los Verdes. La coalición nun tien l’interés de fagocitar a naide, caún conserva la so seña d’identidá y trabayamos en común pol bien del país.
 
¿Qué fuercies entraríen dientro de la coalición?
 
Nun soi quien pa dicir nomes. El camín faise andando y, nel momentu, sentarémonos na mesa y negociaremos con quien tenga disposición pa llegar a alcuerdos. Tampoco ye una cuestión de sumar sigles, ye un proyeutu a llargo plazu, como yá s’amosó.
 
Valledor dicía esta selmana n’otru mediu de comunicación que’l PSOE controlaba en cierta midida a IU al traviés del “mitu de la pinza”, que yera qu’enxamás se votaba col PP anque ésti tuviera razón. ¿Qué papel xuega’l Bloque dientro d’esi mitu de la pinza?
 
Nun hai esa pinza, hai unos alcuerdos de gobiernos firmaos pa lo bono y pa lo malo. Les cuestiones que se salen d’esa fueya de ruta nun aten a naide. Nesta propia llexislatura votóse de xeitu contrariu a la FSA.
 
Nestos años tuvisti trabayando dientro de la Conceyalía de Cultura y Llingua Asturiana de Xixón. ¿Hubo dalguna torga pola cuestión idiomática?
 
Cuando entamé a trabayar nel Conceyu de Xixón pensé que diba topar más torgues de les qu’hai. Cuando entames y fales cola xente, ven que nun hai nenguna rocea y que namás hai qu’avanzar haza alantre. En Xixón, dientro del estatus llingüísticu que tenemos, paezme que la normalización ta teniendo un avance importantísimu y con munches menos rocees cara a la opinión pública de lo que munchos pensaben. Agora mesmo toles llinies municipales usen la toponimia asturiana, les publicaciones municipales usen la llingua… Y naide s’asusta y lo ven con normalidá, esperemos que la situación nun vaya p’atrás.
 
¿Cómo entra la so defensa de la oficialidá dientro d’un Gobiernu mayoritariamente contraria a ella?
 
La oficialidá deféndese en munchos aspeutos. Una de les bases del Bloque por Asturies ye la llingua asturiana, la oficialidá ye l’únicu estatus posible pal asturianu. Pero somos conscientes que firmamos una serie d’alcuerdos de gobiernu. Sicasí, nunca vamos renunciar a la oficialidá, yo como diputáu pienso falar con normalidá n’asturianu dientro del Parlamentu.
 
A Valledor delles veces punxéron-y torgues por usar la llingua na Xunta.
 
Eso foi un problema de Valledor y de lo que pasa na Xunta. Agora ábrese un nuevu momentu, con un nuevu diputáu que falara como sabe falar, amás la llei permíteme facelo.
 
¿Nun supón un desgaste pal Bloque sofitar un Gobiernu contrariu a la oficialidá cuando pa los sos votantes naturales la llingua ye un puntu irrenunciable?
 
Nós tenemos mui asumíu’l tema de la oficialidá, pero hai otres estayes de la sociedá que nun lo ven tan nidiu. La llingua tien qu’avanzar y amosar con naturalidá que ye dalgo común de tolos asturianos y que nun lleva a nengún enfrentamientu. La oficialidá tendremos que defendela nel momentu de la reforma del Estatutu, consiguimos paralizar la reforma estatutaria y ún de los puntos polos que quedo parada foi pol estatus del idioma.
 
Pero esa paralización foi pol non del PP.
 
Eso ye dicir les verdaes a medies. IU-BA-Los Verdes foi la única organización que tuvo un discursu coherente, fuimos los que mantuvimos qu’Asturies necesitaba plenes competencies, que llueu tendríen que desarrollase, y que la llingua necesitaba’l estatus d’oficialidá. El PP partió d’esos máximos y a metá del camín camudó’l so posicionamientu. Los únicos que llevamos un discursu coherente foi la coalición IU-BA-Los Verdes.
 
La reforma estaturaria entamará depués de les eleiciones de 2011. ¿Será un puntu irrenunciable la oficialidá pa llegar a un alcuerdu de gobiernu?
 
Dende’l Bloque camentamos que les próximes eleiciones van xirar sobre esa reforma y lo que va ser Asturies. Nós nun vamos camudar el discursu pa nada y siguiremos pidiendo lo que’l país merez, pa qu’Asturies nun sía una comunidá de tercera y la llingua tenga’l estatus d’oficialidá como drechu irrenunciable.
 
La selmana pasada dabeis a conocer que solicitarais a la Vuelta Ciclista a España. ¿Puxen tamién de dalguna manera pa que la TPA use la toponimia asturiana?
 
Mandamos dellos comunicaos, tanto dende los conceyos como a nivel asturianu, diciendo que la TPA tenía qu’usar la toponimia oficializada. Si sigues les emisiones de la canal pública pues ver que cada vegada úsase más la toponimia oficial. Agora queremos qu’organismos estatales, como ye la Vuelta a España, usen y respeten los nomes tradicionales de los llugares.
 
Dende l’añu 2000 ésti va ser el primeru en que nun xuegue nenguna seleición asturiana. ¿El Bloque nun va dicir nada?
 
Llevamos diciéndolo muncho tiempu. Será una de les coses que tengamos que crear. A min personalmente prestame dir en Navidá a ver xugar a la seleición asturiana, pal añu que vien llucharemos pa poder vela.

Comentarios

El BA diz que consiguieron paralizar la reforma l'Estatutu. Hai un tiempu la UNA pidía que se reabriere esa reforma. Nin siquiera ente formaciones nacionalistes d'izquierda hai sintonía nun tema tán básicu... Según van les coses nun ye mui difícil albidrar que dempués de les prósimes autonómiques la correlación de fuerces va ser asemeyada a l'actual y si entamen la reforma estaturaria  l'estatutu saliente nun va ameyorar al actual y, en temes como'l de la llingua, pue quedar inda peor.
 

La oficialidá ye'l finxu cimeru de tolos que nagüen pol respetu a la llingua y la identidá d'Asturies. Y la Reforma l'Estatutu, onde inxertala. Pero yá nun se pue esperar más pal algame de los drechos llingüísticos del país. Nun se pue parar la Reforma sinón abrise a la xuntanza de tolos que sofiten la oficialidá, y entamala darréu.

PUESTINOS Y POLTRONA = BLOQUE POR ASTURIAS

Nacionalistes del Gobiernu Areces, esperamos ver resultaos positivos

Gabis

Contador Estadistiques