Representantes de la Plataforma d'apoyu a la investigación con célules madre uterines protagonicen un enzarru

Sobre una ventena de miembros de la Plataforma d'apoyu a la investigación con célules madre uterines n'Asturies enzarráronse güei martes, dende les 11.30 hores, nes dependencies del Institutu Nacional de la Seguridá Social cercanes al paséu de Begoña, pa reclamar a los políticos asturianos qu'abran un alderique sobre esti descubrimientu y lu apoyen dende les diferentes alministraciones a les que representen.

"Esiximos que nun haya más retrasos porque cuerre'l peligru de que quede parada o olvidada", dixo a Europa Press, un voceru de los enzarraos, José Luis Iglesias. Iglesias destacó que'l 30 por cientu de la población asturiana y española sufre dalgún tipu d'enfermedá crónica o dexenerativa y añadió qu'esti descubrimientu podría polo menos amenorgar los sos efectos. Por esti motivu, encamentó a los políticos que "miren a los güeyos de los pacientes".

Especialmente destacó'l llabor que puen desarrollar los políticos asturianos de cara a qu'España xestionará de magar xineru la Presidencia de la Unión Europea. Iglesias animólos a que digan sí a esta investigación científica que yá tien patente y que pue evitar enfermedaes o amortiguales. Un descubrimientu desarrolláu pola empresa biofarmacéutica Projech y la unidá d'investigación del Hospital de Xove, dirixida pol doctor Francisco Vizoso.
  
De la mesma manera, señaló qu'esti enzarru marca "un antes y un dempués" de toa una serie de movilizaciones en señal d'apoyu que la Plataforma tien planiaes. Iglesias llamentó que dende les instituciones se fale muncho d'apostar pola investigación y el desarrollu, cuando se ta "dando la callada por respuesta" con respeuto al pidimientu de fondos pa sufragar esti descubrimientu.
  
Tamién apuntó qu'axentes del Cuerpu Nacional de Policía fueron yá a les dependencies de la Seguridá Social en tres ocasiones y que caltienen contactu con responsables de la oficina. Iglesias señaló que se trata d'un enzarru pacíficu y que les persones que tovía permanecen enzarraes marcharán si los desagospia la Policía. Sicasí, recalcó que siguirán apoyando l'únicu descubrimientu científicu importante con patente española qu'hubo nos últimos años.